SUPERBALITA CEBU

Luigi, Carlo 'taas-noo' mokanaug sa pwesto

OUTGOING MANDAUE OFFICIALS: Sila si outgoing Mayor Luigi Quisumbing (wala) ug outgoing Bise Mayor Carlo Fortuna (tuo) nibatbat sa ilang kaayong ikabilin sa dakbayan sa Mandaue, dili lang kabahin sa inprastraktura, lakip sa pagsilsil sa katawhan sa insakto nga pangagamhanan ug hugot nga pagpatuman sa balaud, ug mapaubsanong mokanaug sa pwesto. (SunStar File Photo)

"DISIPLINA, maayo nga pamatasan, saktong panghunahuna, paghatag og bili sa kalikupan sama sa kasapaan, paghipos sa basura, paghatag sa mga gikinahanglang serbisyo, mga nadawat nga pasidungog sa Mandaue City government.."

Mao lini ang pipila nga gisaysay ni outgoing bise mayor sa siyudad sa Mandaue Carlo Fortuna nga ilang mabilin sa mga lumolupyo sa dakbayan.

Dugang niya nga mapahiubsanon apan 'taas-noo' nga mokanaug sa pwesto isip mayor ug bise mayor sa Mandaue sila si Luigi Quisumbing ug Fortuna.

Matod ni Fortuna, kay dili lang sa inprastraktura nga aspeto nila napalambo ang siyudad, kundi ang pagdisiplina kalabot sa pagsunod sa lagda, ug ang insakto nga panghunahuna alang sa mas maayo nga ugma.

Human nga sulod sa tulo ka tuig nga pagdumala, dugang ni Fortuna, bisan og tuo’g wala ang ilang nadawat nga batikus gikan sa ubang motorista, apan daghan usab sila nadawat nga mga komento, nga sa Mandaue, magkinto gyud sa pagsunod sa lagda sa trapiko, dili lang mga molupyo kundi ang tanan nga moagi sa dakbayan.

Kini sama na lang sa ‘no beating the red light’, ang dili pagpataka og parking sa daplin sa dan, sa strikto nga pagsunod sa no u-turn ug right/left turn signage, ang kontrobersyal nga prescribed nga gamitong helmet ug uban pa nga lagda sa trapiko.

Lakip na ang paglabang diha gyud sa pedestrian lane. Diin sa maong paagi, nakat-on ang mga motorista sa pagrespitar sa mga pedestrian ug ang pedestrian ngadto sa mga motorista.

Pinaagi usab sa political will sa maong administrasyon, gihulagway ni Fortuna nga malampuson napatuman ang plastic ban, ang segregation sa basura ug hingpit nga pagpasirado sa Umapad dumpsite alang na sa 10 ngadto na sa 15 ka tuig nga pag-rehabilitate niini.

Sa kapin usa lang ka tuig, nagmalampuson usab diha sa pagpabuhi ug sa padayon nga pagpalimpyo og balik sa parte sa Butuanon river, nga mao ang nahimo nga river model, atol sa gihimo nga 4th international river summit.

Sa maong kalihukan usab naawhag ang tanang ahensya, lokal nga kagamhanan ug indibidwal sa tibuok nasud alang sa pagpanglimpyo sa mga sapa.

Daku nga kalampusan usab nga ilang gitan-aw ang napatuman nga Hinabang sa Edukasyon, Livelihood ug Pagtabang sa tanan (HELPS) nga nag-salamin sa mga programa sa Department of Social Welfare and Development (DSWD).

Anaa usab ang pagpatuman sa kahapsay ug kalinaw sa tabang sa law enforcers.

Pipila usab ka inprastraktura ang napatukod sa build build project sa pamunuan, diin sa matag ayuhon nga mga dalan, giuna pag-ayo ang drainage system, kini aron usab sa pagtubag sa problema kaniadto sa baha.

Diha sa konseho, sa iyang pagdumala ni Fortuna, nahimo ang Data Management System, diin dali na ang pag-monitor ug pag-account kon asa ug kang kinsa nalangay ang usa ka transaksyon.

Si bisan kinsa ug bisan asa paman ma-access na usab ang mga balaudnon nga napanday, bisan na kadtong 50 na ka tuig ang nalabay, diha lang sa pag-search sa net.

Ug tungod niini, nahimo nga Outstanding Sangguniang Panlungsod sa Highly Urbanized City sa Central Visayas ang Mandaue, ang pasidungog gikan sa kauluhan.

Sa ilang termino, nadawat ang mga pasidungog nga top 13 Most Competetive City, gikan sa kaniadto nga anaa lang sa ika-70 nga dapit, giila nga Business-friendly City, Highest Performing Anti-drug Abuse Council, Child-friendly City.

Ug labing una nga siyudad nga giila ang pamaagi sa community-based rehabilitation program alang sa drug surrenderers, usa sa rason nga nahatagan og P2 milyones nga balor sa Anti-drug rehab center, nga hingpit napatindog, Disyembre sa miaging tuig.

Si Fortuna nanghinaot nga sa mosunod nga administrasyon, kinsa hingpit na nga molingkud sa Hulyo 1, sila si outgoing 6th district representative, ug karon mobalik pagka-mayor Jonas Cortes, ug bise mayor niini nga si outgoing Provincial board member Glenn Bercede, nga unta ihatag sa maong pamunuan ang angay sa siyudad.

Si Fortuna, kinsa usa ka abogado, nitug-an nga gawas sa usa ka pribado unya nga indibidwal, mobalik siya sa pagtutok isip practising lawyer ug pabilin nga moserbisyo ug motabang sa Mandaue sa iyang kaugalingon nga pamaagi ug kapasidad.

“These are perhaps one of the things that we wish that will continue to sustain it all depends on the leader. It all depends on the one who is leading the priorities and his policies, kay if you become lenient, you know, ang Pilipino man gud by nature, we tend not to follow the rules. We are very impatient bisan man gani sa queuing up diha sa airport, simbahan di ganahan molinya, gusto mo-overtake," matod ni Fortuna.

Alang ni Fortuna, busa importante nga makanunayon ang kahigpit sa pagpatuman sa disiplina.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph