BISAN sa pagpalyar sa pipila ka mga voters registration verification machine (VRVM) ug sa mga vote counting machine (VCM) sa eleksiyon niadtong Mayo 13, buot gihapon sa mga tinugyanan sa Cebu Provincial Commission on Election (Comelec) nga gamiton kini sa mosunod pa nga mga piniliay.
Kinahanglan lang nga dunay himuon nga technical enhancement ug modification sa sistema aron dili na masubli pa ang pagtumaw sa mga kakulian.
Nihimo ug post-election conference ang 51 ka mga election officer sa probinisya sa Sugbo kauban si acting election supervisor Atty. Jerome Brillantes niadtong Martes hangtud kagahapong adlawa ngadto sa isla sa Camotes.
Ang pagpalyar sa pipila ka mga VRVM ug mga VCM atol sa piniliay maoy nag-unang problema nga gi-report sa mga EO.
Taliwala niini, gipadayag ni Atty. Brillantes nga positibo gihapon sila nga susamang mga teknolohiya nga gamiton gihapon sa mosunod nga mga eleksiyon.
Ang VRVM gitumbok niya nga dako ug tabang aron paspas nga makit-an ang records sa mga botante sukwahi kung sa pagamit sa manual nga listahan.
Kinahanglan lang nga dunay modification nga himuon ang IT Department sa komisyon sa sistema niini aron dili na kini motiurok atol sa aktwal nga pagamit.
Sa nasayran, ang Sugbo usa sa mga pilot provinces sa tibuok nasud, diin gipatuman ang pamit sa VRVM.
“Modification. With simple modification na lang gyud to. Mao ra’g i-simplify lang ang kuan (system) para dili kaayo maglibog ang mga maestra ba,” sigun ni Brillantes.
Sa laing bahin, ang mga corrupted SD cards sa mga VCM sa miaging piniliay, usa sab sa mga problema nga nitumaw.
Subay niini, gisugyot ni Brillantes nga mopalit ug dekalidad ug lig-on nga SD cards ang Comelec nga maoy gamiton sa mosunod pa nga mga eleksiyon.
Gawas niini, gipadayag niya nga kinahanglang dugangan sab ang mga contingency o back-up VCMs atol sa adlaw sa piniliay.
Ang mga depektosong SD cards maoy naka-ingun sa pagkalangay sa transmission sa resulta gikan sa kalungsuran, nga nakaapekto sa canvassing sa resulta sa eleksiyon.
“More contingency or siguro enhancement, unsa may maku-an nato nga naa may problem na-encounter nato, nga naingun ato man siya. Second, sa SD card, as publicly claimed by the kuan nga baratohon ra tong SD card, so the more nga next time, kato na gyung SD cards nga mahal-mahalon,” niingon si Brillantes.
Dunay mga palpak sa miaging piliay apan malampuson kini sa kinatibuk-an. (AZLG)