NITAMBONG ang mga representante sa Provincial Disaster Risk Reduction and Management Office (PDRRMO) sa pipila ka Brigada Eskwela activities sa probinsiya karon nga nagsingabot ang pagbukas sa klase sa pampublikong tunghaan.
Matod sa PRRM officer nga si Rhee Telen Jr. dunay team nga nagsubay sa mga safety ug precautionary signage, nga makatabang sa luwas nga paglatas sa mga tinun-an diha sa kadalanan.
Gitan-aw sab nila ang pisikal nga mga feature o edipisyo sa mga tunghaan aron pagsiguro nga dili kini magdala og risgo sa magtungha nga kabataan panahon sa kalamidad.
“Among i-ensure nga ang mga early warning signs, nga naka-in place na siya, ilabi na katong naa sa mga highway. Mao na nga ang ubang mga LGUs, ni-charge gyud sila ug mga pang-pintal, mga sin, mga early warning sign, nga i-charge sa DRRM for the schools nga ilang magamit, para inig abot sa eskwela, ready na tanan,” niingon si Telen.
Gawas sa pagsiguro nga luwas ang mga tunghaan ug kadalanan alang sa mga tinun-an, gisiguro sa PDRRMO nga maandam usab ang mga magtutudlo ug ang mga bata sa mga angayang buhaton kung matungnan og emerhensiya.
Kini pinaagi sa pagpanghatag sa mga instructional material nga sama sa CD ug handbook.
Sigun ni Telen, ang CD dunay unod nga puppetry nga giuluhan ug Tales of Disaster, diin gi-dramatize ang mga scenario unsaon nga magpabiling luwas ang mga bata panahon nga dunay bagyo, linog, baha, volcanic eruption ug uban pa.
Gihubad ang presentasyon sa pinulungang English, Filipino, Ilocano, Waray, Hilagaynon ug Bisaya.
Dugang ni Telen nga ang manual o handbook nga kauban sa CD, gipanghatag ngadto mga magtutudlo aron mas mapasabot nila ang kabataan sa unod sa gitan-aw nga audio-video material.
“Di man ta permi naa didto but at least ang teacher could follow up the things that we discussed which is na-encapsulate dinhi sa gipanghatag nato nga Tales of Disaster. The Tales of Disaster is a puppetry, in partnership with Sesame Street. Silay naghimo ani,” padayag ni Telen.
Maobot sa 1,000 ka mga kopya ang gi-andam sa PDRRMO sa handbook ug CD. Mohatag ra usab sila ug soft copy niini, kay ila ra usab kini nga nakuha gikan sa usa ka non-government organization, kansang adbokasiya kalabot sa DRRM.
Sigun ni Telen, ang gihimo sa PDRRMO, kabahin sa Information and Education Campaign sa school-based DRRM program sa ilang opisina. (AZLG)