PATAY ang kapitan sa Barangay Balao, lungsod sa Barili human mabanggai sa Mazda pick up ang ilang gisakyang habal-habal sa sitio Tayong, Barangay Guibuangan, alas 9:30 sa buntag sa Miyerkules, Mayo 29.
Ang biktima giila nga si Heraclea Himaya Lastimosa, 70, incumbent nga barangay kapitan sa Balao.
Duha sa iyang mga kabanay nangaangol usab.
Dali unta siya nga gidala sa Barili District Hospital, apan gideklarar siya nga dead on arrival tungod sa kadaot sa iyang lawas.
Matod ni Police Chief Master Sergeant Marcelo Cañedo, traffic investigator sa Barili Police Station, nga sakay ang kapitan sa motorsiklo nga gimaneho sa iyang barangay tanod nga si Rolando Himaya Rebuyas, 36, taga sitio Candahunog.
Aduna usab kini laing angkas nga mga bata nga silang Janelle dela Torre Rebuyas, 10, ug igsuon niini nga si Jerone dela Torre Rebuyas,4, pulos nagpuyo ra usab sa maong barangay.
Wa magrabehi ang magsuon lakip na si Rolando.
Nagsubay ang motorsiklo nga gisakyan ni Lastimosa sa national road sa Barili paingon sa lungsod sa Dumanjug.
Apan sa pag-abot sa Barangay Guibuangan, ilang nasugatan ang pick up nga ni-overtake sa laing sakyanan ug nasaghiran sila niini.
Nabangga sila sa kusog nga nagdagang Mazda pick up ug nangalagpot ang sakay sa motorsiklo.
Tungod kay wa na makontrolar sa driver sa pick up ang manobela, nabangga na usab kini sa 10 wheeler truck nga iya sa Ylad Construction and Trading Corporation nga nahimutang sa lungsod sa Carmen, Sugbo.
Giila ang driver sa Mazda pick up nga si Rico Silvano Broce, 42, taga Banhigan, lungsod sa Badian, trabahante sa Librando bus liner.
Ulo sa babayeng kapitan napantok sa semento.
Ang mga bata nga angkas sa motorsiklo nakaangkon og menor nga mga kadaot sa lawas, apan gidala sa Vicente Sotto Memorial Medical Center.
Ang pick giingong mo-rescue unta sa Librando bus nga nadaot sa Barangay Tubod, Barili.
“Kining motor gikan ni sa Barili proper padung sa Dumanjug Cebu. Nya kining 10 wheeler truck nagsunod pud sa motor. Kining mazda gikan sa Badian padung sa Tubod kay naay nadaot nga sakyanan sa Librando. Ni-over take ning mazda, pag over take ani ni encroach ni sa linya sa motor mao tong na side sweep ug na crash sa karsada,” matod ni Cañedo.
Natanggong sa Barili police station si Broce bisan angol ug mag-atubang kining mga kasong reckless imprudence resulting in homicide and serious physical injuries ug damage to property.
Samtang si Roland nasuta nga way lisensya apan anaa pa sa tambalanan sa Barili.