PATAY ang usa ka 28 anyos nga lalake nga taga Barangay Dumlog, Talisay City human mabangga ug mapasok ang iyang motorsiklo sa nag parking nga 10-wheeler truck nga puno sa kargang semento duol sa Plaza Sugbo sa Cebu South Coastal Road.
Ang biktima giila nga si Marvin Esparagera Bulilan, 28, taga Dumlog, Siyudad sa Talisay, nakaangkon og grabeng kadaot sa ulo ug lawas.
Sakay ang biktima sa iyang Kawasaki Fury padung motrabaho alas 6:16 sa buntag sa Huwebes, Mayo 30, apan wa mabantayi ang truck nga nag parking daplin sa karsada.
Ang truck nga puno sa kargang semento gimaneho ni Domingo Avinido Baay, 39, taga Barangay Umapad, Siyudad sa Mandaue.
Gikan sa Taiheiyo cement sa lungsod sa San Fernando ug modiretso sa Pier 3 si Baay aron ikarga ang mga semento sa barko paingon sa Mindanao.
Apan nadaot ang bolt sa luyong ligid sa truck mga pasado alas 3 sa kaadlawon hinungdan nga iya kining gipadaplin.
Matod niya nga nagbutang pa siyag early warning device sa distansyang bahin sa luyo sa truck.
Apan gibanggaan usab kini sa biktima hinungdan nga midiretso kinig kapasok sa ilawom.
Namatay diha-diha si Bulilan tungod sa kakusog sa impact ug na boak ang ulo bisan kon nag-helmet.
Matod ni Police Chief Master Sergeant Filomino Viquezo Jr., traffic investigator sa Mambaling police station, nga ilang gitanggong ang driver sa truck kay basin mopasakag kaso ang pamilya ni Bulilan.
Bisan kon di siya maoy nakabangga, kinahanglan pa gihapon siya nga manubag ilabi na nga adunay tawo nga namatay.
“Ato pang tan-awon unsay iyang negligence ani. Nag-parking ra man ni. Ang ila lang problema dugay kaayo nila naayo ilang sakyanan mga alas 3 sa kaadlawon pa gud na. Nya alas 6 na lang wala pa matagad bah,” matod ni Viquezo.
Tungod sa maong disgrasya mimugna kinig grabeng traffic sa Cebu South Coastal Road.
Pahimangno sa kapulisan sa mga motorista nga mo agi sa SRP nga dili magpakusog sa pagpadagan bisan sa sayo sa buntag sanglit usa ni sa hinungdan sa disgrasya.