GIIMBESTIGAHAN karon sa kapolisan ang kalambigitan sa tag-iya sa lima ka mga salakyan nga gipangsunog sa gitouhang grupo sa New People's Army (NPA) didto sa Barangay Sto. Nino, lungsod sa Manolo Fortich, Bukidnon, mga alas 11:30 sa gabii, Mayo 28.
Matud ni Police Lieutenant Colonel Surki Sereñas, tigpamaba sa Police Regional Office Northern Mindanao, nga dili pa nila manganlan ang tag-iya niini tungod kay ila pa kining gipailawoman sa imbestigasyon.
"Ongoing ang atong investigation. Initially, the registered owner of the Elf truck and L300 van were already identified. But we are digging deeper as to their involvement in the attack," pahayag ni Sereñas sa SunStar Superbalita.
Dugang niini nga kalabot sa bahad sa walhong grupo nga pagpangatake sa police station, gibutyag niini nga nangandam na sila niini ug duna nay direktiba ang regional director nga si Police General Rafael Santiago Jr.
"Atong gihimo mao ang target hardening, intel monitoring, social investigation ug pagbisita sa kabarangayan," matud niini.
Kahinumduman, moabot sa usa ka gatos ka mga walhong grupo sa New People's Army ang namatikdan sa mga residente sakay sa upat ka mga sakyanan.
Gidudahang tungod kay wala nay katagoan human ang mga sundalo naka-immersed na sa mokabat 100 ka mga barangay sa lalawigan sa Bukidnon, nangita og mabalhinan ang walhong grupo.
Nangarnap og mga sakyanan ang walhong grupo ug maoy gisakyan ug ngani nagtambay pa ang mga armado ug nangaon.
Pagdangat nila sa Barangay Sto. Nino sulod sa palm oil plantation sa lungsod sa Manolo, giingong gibabagan kini sa barangay tanod ug wala milampos sa pagpangatake. Gisunog ra sab ang ilang gisakyan nga duha ka L300 van, usa ka elf, usa ka Hilux nga pick-up ug duha ka motorsiklo, nalakip pa ang upat ka punoan sa palm oil ug dayon sibat.