ISIP kabahin sa pagpangandam sa pagbukas sa klase sa tanang pampubliko nga eskwelahan karong Lunes, Hunyo 3, mga tinun-an nangunay sa pagsusi sa kaluwas sa ilang school building sa dakbayan sa Mandaue.
Samtang dul-an sa 200 ka mga pulis ipakatap sugod karong Hunyo 3 hangtud sa Hulyo duol sa mga eskwelahan sa Mandaue.
Naabtan sa Superbalita Cebu atol sa pagduaw sa Comprehensive National High School ang grupo sa mga tinun-an nga nituyok sa ilang building, nanagdala og hazard map, nangunay sa pagpamutang og singage alang sa emergency exit.
Gisusi usab nila ang mga fire extinguisher kon functional pa kini. Gani nasuta nga matag buwan gyud kini nila nga susihon.
Gitan-aw ang drainage system, asa nga parte nga kuyaw maagian sa mga tinun-an kay adunay nag-ali o nagpadayon ang pag-repair.
Ang maong grupo sa mga tinun-an ang nitug-an nga kabahin sila sa Student Watch Action Team (SWAT), kinsa gipaubos na sa training alang sa basic nga fire fighting, first aid, ug pagsuta sa mga lugar nga posibleng risgo sa kabataan.
Na-train sila sa tabang sa Mandaue City Disaster Risk Reduction and Management Office, sa Bureau of Fire Protection ug sa kapulisan.
Matod ni Sean Osorno, grade 10 student, kinsa maoy pangulo sa SWAT, nga ang ilang mga nakuha nga impormasyon ila usab ipahibalo sa mga magtutudlo.
“What we have observed and discovered, will be reported to our moderator. Along with sa among report ang amo sad nga suggestions. Kini aron mapahibalo namu ang mga other students, like nga dili sila dapat moagi dire, likaya2` nila kay padayon gi-trabaho ning kanal,” pagpasabot ni Osorno sa Superbalita Cebu.
Hinuon, ang tunghaan anaa gyud usay utility nga maoy kanunay nga nagsusi sa eskwelahan.
Gipang-postingan na usab og mga listahan sa mga estudyante alang sa matag classroom.
Adunay gipahimutang nga help desk, alang niadtong buot pa nga magpa-enrol, ang CNH sa Mandaue City, ang usa sa gipanlantawan nga adunay unyay dul-an o kapin sa 4 mil ka mga tinun-an ning abli sa klase.
Samtang, sugod karong Dominggo, Hunyo 2, mopahimutang na ang mga pulis sa Mandaue City Police Office sa ilang mga Police Assistance Desk (PAD), diha sa mga tunghaan.
Nakig-alayon usab sila sa Traffic Enforcement Agency of Mandaue (TEAM), alang sa pag-man sa trapiko duol sa mga eskwelahan.
Dul-an sa 200 ka mga pulis uban ang mga force multipliers sa ipakatap duol sa mga tunghaan.
Duha ka giilang tunghaan nga adunay daghang estudyante, ang City Central School ug Paknaan Elementary school ang tuyuon sa pagduaw sa MCPO director, uban na ni PRO-7 director, Brigadier General Debold Sinas.
Samtang aron mas mapaduol ang mga pulis sa kabataan, ang MCPO pulis mascot ang ikuyog nila sa pag-roving ug moapud-apud og ginagmay nga pampalipay sa mga bata ang mga pulis sa MCPO, ilabi na alang sa mga grade 1 pupil, karong Lunes, Hunyo 3.
Gitambagan ang tanan nga magsayo aron dili unya maungot sa trpiko sa unang adlaw sa klase. (FMD)