MGA simbahan ang giawhag sa kapulisan nga mas maayo nga momuntar og mga closed-circuit television (CCTV) aron pag-monitor ug makatabang kon ugaling adunay mga krimen nga mahitabo.
Usa sa manimbahay sa National Shrine of St. Joseph si Leo, 56 anyos, ang apil sa pipila ka maningkamot nga makasimba gyud makaduha sa usa ka semana, dili lang sa adlaw nga Dominggo, ang daku nga uyon sa panawagan sa pulis, alang sa pagmuntar sa CCTV.
Gisegundahan usab kini sa inahan nga taga Barangay Basak nga si Delsa Limpag, kinsa niangkon nga sa ka-focus diha sa imung pag-ampo, kasagaran dili na makabantay, kon kinsa ang nitapad kanimu o anaa sa imung likod, ug unsay ilang gipang buhat.
“Ou maayo gyud naay, CCTV, aron makita kon naay magbinuang bitaw,” saysay ni Leo sa Superbalita Cebu.
Apan giklaro nga ang maong panawagan dili lang alang sa Simbahang Katoliko, apan sa uban pa nga relihiyon o kahugpungan sa mga magtutuo o religious group, kinsa adunay gitawag nga mga balay alampuanan, o lugar diin sila mohimo og mga pag-simba sa giila nga Ginoo.
Sama sa ubang mga establisemento, mga tindahan, paabangan nga panimalay, bangko ug uban pa nga lugar diin daghan magtapok ang mga tawo, nga sulod na sa pipila ka tuig nga gi-require kini sa mga local nga kagamhanan nga aduna gyud CCTV.
Kini gawas pa sa mga security guard nga mobantay usab.
Matud ni Mandaue City Police Office director, Police Colonel Julian Entoma, nga labing maayo usab, nga diha mismo sa mga simbahan, sa sulod ug sa gawas aduna usab CCTV.
Ug nga mas maayo aduna usab mag-monitor niini, ilabi na sa kon adunay dagko nga kalihukan aron magamit gyud siya isip pagpakgang sa mga tawo nga adunay dautan nga tuyo.
Kini ang nitumaw nga awhag ni Entoma ngadto sa mga simbahan, human nga hapit na mo-usa ka bulan human sa nahitabo nga gisaka ug gikawatan gyud ang kura paruko sa National Shrine of St. Joseph sa dakbayan sa Mandaue.
Nahitabo kini samtang nagpadayon ang santos nga misa alang sa kapistahan ni San Jose, Mayo 8.
Giangkon ni Entoma nga bisan kon ang kombento, adunay CCTV, diin nakita ang duha ka lalaki nga maoy gidudahan nga nangawat, apan wala nay dugang pa nga impormasyon ang mga pulis kalabot sa mga suspetsado.
Kahinumduman nga nahimo usab nga target sa mga terorista ang pagpamomba sa mga simbahan, sama nalang sa nahitabo sa nasud sa Sri Lanka, niadtong Semana Santa, Abril tuig 2019.
Matud ni Entoma nga nihimo na sila og pasiuna nga pag-awhag sa mga pastor, kalabot sa maong katuyuan, nga gihangop usab, ug nakita ang kamahinungdanon sa CCTV diha sa ilang mga ablay-alampuanan.
Dugang pasabot sa director, nga kon aduna pay CCTV sa sulod ug gawas sa simbahan, mamahimo nga ma-review ang palibot, ug posible nga masuta ang mga tawo nga kadudahan og lihuk nga motuyo sa mga simbahan kay adunay dautang tinguha.
Laing posible nga masumpo pa niini, kadtong mga salisi, manyempuhay diha mismo sulod sa simbahan ug ang mga posibilidad sa pagpamomba.
“Kay ang mga tawo nga gusto gyud mohimo og dautan against sa uban, dili na sila mopili kon naa ba sa sulod sa balay sa Ginoo, simbahan o bisan asa pa na, wala na silay kahadlok, mas maayo gyud nga nay CCTV diha sa mga simbahan, kay aron ma-monitor, kay dili man sad makaya na og bantay sa gwardiya ug bisan sa pulis ang tanan nga mosulod gawas sa simbahan,” pagpasabot ni Entoma.
Alang sa director nga kon mapunduhan sa usa ka parokya o sa pari ug mga pangulo sa mga religious group ang alang sa pagpadaku o pagpaanindot sa usa ka simbahan, angay nga mogasto alang usab sa kaluwasan sa mga manimbahay. (Superbalita Cebu)