GIDEKLARA ang mga barangay sa Sirib ug Dacudao sa Distrito sa Calinan isip “drug-cleared” Huwebes, Mayo 30, sa City Hall of Davao.
Sila ang unang drug-free barangay sa Davao City human nakatuman sa parametros nga gitakda sa board alang sa “drug-cleared” nga barangay.
Kahinumdoman nga si Davao City Mayor Sara Duterte-Carpio kanhi nagsulti nga di siya mopirma og bisan unsang sertipikasyon alang sa drug-free tungod kay di siya kombinsido nga ang gideklarang drug-free barangays tinuod gyud nga “drug-free” ug buot niyang dunay konkretong basehan gikan sa Department of Interior and Local Government (DILG) sa pagdeklara niini.
Ang duha ka mga barangay nakasunod sa parametros nga gitakda sa Dangerous Drugs Board Regulation Number 3, Series of 2017 human nipailawom og balidasyon sa Regional Oversight Committee.
Mga miyembro sa komite nagtigum aron nga ibalidar ang giingong pagtuman pangulohan ni Philippine Drug Enforcement Agency Regional Office (PDEA) Davao director Antonio Rivera, Department of Interior and Local Government (DILG) City director Vicky Sarcena ug Calinan Police Station commander Police Major Aquiomedes Crosby Wesley.
Aron nga mahimong limpyo sa druga, usa ka barangay nga kanhi drug-affected ipailawom sa drug-clearing operation ug ideklarang limpyo na gikan sa bisan unsang ilegal nga kalihukan sa druga subay sa mga parametros nga gitakda.
Si Rivera nipasalig nga ang PDEA aktibong mosuporta sa kampanya sa gobyerno batok sa ilegal nga druga aron nga maangkon ang drug-free nga nasud. (JCR)