Cousins posibli nang makaduwa karong buntag

NAGPANIKAD si Demarcus Cousins nga makabalik na og duwa apan ang Golden State wa pa makapagawas sa ilang desisyon.

Hinuon gikataho nga naalim na iyang paa nga naangol atol sa first round playoffs batok sa Los Angeles Clippers.

Gani niapil na siya sa practice kagahapon ug alang kaniya nga wala na gyuy kakulian pa sa iyang panglawas.

Mismo si coach Steve Kerr mikompirmar atol sa NBA Finals Media Day nga wala nay gipamati si Cousins apan sa gihapon dili pa siya kasiguro sa status sa iyang big man kon makaduwa ba kini sa Game One sa title series batok sa host Toronto Raptors karong buntag sa Scotiabank Arena.

“This is not the regular season. This is The Finals. So we have to figure out what’s the best way to utilize him,” matod ni Kerr.

Ang Warriors mitaktak sa Clippers sa Game 6, mipalagpot sa Houston Rockets sa Eastern Conference semifinals sa Game 6 gihapon ug nagkinahanglan lang og upat ka duwa aron idispatsar ang Portland Trail Blazers sa ilang conference finals.

Ang 28-anyos nga Cousins, sa iyang unang pagduwa sa playoffs, mipadayag nga anaa na man tuod siya sa saktong kondisyon apan ang team ra gyud ang nasayod ug makabuot kon makaduwa na ba siya sa finals.

“It’s never really up to me. We’ll put our heads together and come up with the best plan moving forward,” panapos ni Cousins sa usa ka interview didto sa Amerika. (JBM)