GILAUMAN nga dugokan sa mga tawo ang Rizal Park karong adlaw, tungod sa dakong kumbira nga idalit alang sa katawhan sa dakbayan sa Davao.
Gibanabana nga 10,000 ka mga indibiduwal ang gilauman nga motambong sa selebrasyon sa Hugpong ng Pagbabago’s (HNP) thanksgiving activity adlaw’ng Biyernes, Mayo 31.
Ang aktibidad, gitawag og “Daghang Salamat, Davao City”, mao ang libreng paniudto ug panihapon sa Rizal Park sa dalang San Pedro ning dakbayan.
Ang thanksgiving party iselebrar, kapin duha ka semana human ang HNP, usa ka regional party ni Davao City Mayor Sara Duterte-Carpio, nisaw-it og siyam sa 12 ka puwesto sa Senado atol sa 2019 midterm election.
Sa dakbayan sa Davao, tanang kandidato nga giendosar sa HNP gibotohan sa Magic 12.
Ipatuman ang temporaryong pagsira sa kadalanan duol sa lugar gikan sa 12:01 sa buntag Biyernes, Mayo 31, hangtud alas 6 sa buntag sa Sabado, Hunyo 1.
Kini mao ang porsiyon sa dalang Bolton nga naa sa tunga sa Rizal Park ug City Council Building, gikan sa korner sa dalang San Pedro Street hangtud sa korner sa dalang Magallanes; City Hall Drive sa tuong bahin, taliwala sa Quezon ug Rizal parks hangtud sa City Engineer’s Office ug City Planning and Development Office; ug ang dalan atubangan sa City Hall.
Ang selebrasyon gitunong sab sa ika-41 nga adlaw nga natawhan ni Mayor Duterte-Carpio.
Sayo niini, ang mayor nagpasalamat sa tanan kinsa nisuporta kaniya ug sa iyang partido atol sa kampanya.
Iya sab nga gipasalamatan ang mga Dabawenyos nga nihatag og “12-0 vote” alang sa mga senador sa HNP, ug nagkanayon nga kini ang pinaka-una sa kasaysayan sa siyudad.
“Daghang Salamat sa inyong tanan. I have said that I feel alone everyday stressing over making sure Davao City is OK, but when I need am in distress, Dabawenyos carry me on their backs,” matud niya sa niaging Instagram post.
Wala pay dugang detalye ang gibutyag kon si Duterte-Carpio ug iyang kapartido motambong atol sa kalihukan.