Migallen: Warriors in Six

DUNA man tuoy mipabor sa Toronto Raptors, apan mipasuwabi gyud ang pagka-inilog sa defending champion Golden State Warriors sa 2019 National Basketball Association (NBA) Finals nga sugdan karong buntag (oras dinhi sa Pilipinas).

Kini tungod kay ang Golden State proven na sa ilang pagka-Warriors og eksperyensiya sa niaging upat ka sunodsunod nga seasons sa finals diin tulo niini ilang nalangkat ang kampiyonato.

Bisan pa man gani og wala ang duha sa ilang starters nga sila si Kevin Durant ug ingon man si DeMarcus Cousins, yano ra gihapon kaayo nilang gipangpildi ang ilang mga kaatbang sa Western Conference playoffs.

Pero sa ilang pagtaak sa finals, kini maoy unang higayon nga wala kanila ang homecourt advantage ug gawas niini, premiro usab kini nga dili Cleveland Cavaliers ang ilang gikaabot sa finals. Sa ato pa, lahi ang timplada karon sa ilang kontra.

Sa duha nila ka panagsangka sa regular season, wa ni makabawos ang Warriors sa Raptors, sa ato pa dunay dag-anan ang Raptors o kanang gitawag sa mga sugarol og silat.

Usa sa mokawat og atraksiyon ning kombatiha mao ang match-up tali ni Leonard ug sa beteranong si Andre Iguodala.

Si Iguodala maoy usa sa gitahasan ni Golden State coach Steve Kerr nga maoy moatiman ug mokontrolar sa opensa ni Leonard.

Apan dako ang akong pagtuo nga paduwaon ni Kerr ang higanting si DeMarcus Cousins karong buntag.

Ug ang presensiya ni Cousins ang makahatag og problema ni Leonard sa ilawom nga bahin.

Pipila sa atong mga higala ug mga batid nga tigsunod sa atong lindog ang nagpangutana kon unsay atong basa ning maong series.

Sa gikaingon ko na sa unahan, nga inilog man tuod ang Warriors apan dili sab ka kompiyansaan ang Raptors.

Nagsaka ang performance ni Leonard sa playoff diin mirehistro siya og 31.2 points per game, 8.8 rebounds ug 3.8 assists. Apan sa gihapon nagkinahanglan siya og igong suporta ilabi na sa gawas nga bahin.

Posibling sa Game One modaog ang Raptors tungod kay taas pa kaayo ang moral niini ug anaa pa usab kanila ang momentum kon itandi sa Warriors nga hataas og pahuway nga makaapekto sa ilang kahanas.

Pero lupigon sila sa lahutay sa Golden State ilabi na ug makaduwa na si Kevin Durant. Notado man gud ning Warriors nga kon magkadugay ang duwa magkanindot ang ilang chemistry ug dinhi mopatigbabaw gyud ang ilang championship experience.

Ang gipakita ni Draymond Green nga maayo usab kaayong nakahulip sa luna nga temporaryong nabakantihan ni Durant maoy laing mahait nga hinagiban ni Kerr.

Si Green nag-average na karon og 13.6 points, 9.9 rebounds, 8.2 assists ug 1.4 steals nga igo kaayong nakasuporta sa iyang pangangkon nga best-ever defender sa NBA.

Ang solidong gipakita usab ni Stephen Curry kinsa nag-average og 27.3 points, 6.3 rebounds ug 5.6 assists ang laing babag sa tinguha sa Raptors.

Sa hamubo nakong panglantaw, Warriors in Six. (jun.migallen22@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph