MGA duwa karon:
4:30 pm. Phoenix vs. Blackwater
7:00 pm. Rain or Shine vs. Meralco
Human sa usa ka buwan kapin nga pagpahuway, mobalik na og sulod sa korte ang Rain or Shine karong gabii nga ikauban ang champion import nga si Denze Bowles batok sa Meralco Botls sa PBA Commissioner’s Cup sa Mall of Asia Arena.
Si Bowles ug James Yap, ang panagparis nga nakatilaw na og kampiyonato ning maong conference naidtong 2012 sa dihang didto pa sila sa B-Meg Llamados (nga karon mao na ang Magnolia Hotshots), sa makausa pa mosuway sa pagpasubang og balik sa ilang mahika sugod sa alas 7 sa ang takna batok sa Bolts.
Ang E-Painters gikan pa sa ilang semifinal finish sa niaging Philippine Cup diin napildi sila sa Game 7 batok sa Hotshots, bisan pa man og nakaposte na unta kini og 2-0 nga bintaha.
Ang Bolts sa ilang bahin, katulo na makaduwa ning maong conference. Ilang gipildi ang Columbian Dyip, 101-92, Napildi sila sa Blackwater Elite, 94-91, ug gipukan usab sila sa Barangay Ginebra, 95-110 niadtong Dominggo.
Kini maoy ikalimang higayon sa 30-anyos nga Bowles isip import sa PBA. Nahimo siyang reinforcement sa Magnolia sa 2012, 2013, 2015 ug 2016.
Malaumon ang E-Painters ni Bowles dakog ikatabang sa ilang kampanya.
Masubhan ang kampanya sa E-Painters sa Commissioner’s Cup batok sa Bolts, ang team nga ilang gika-trade sa ilang kanhi pambato nga si Raymond Almazan.
Apan ang laing mokawat og atensiyon mao ang panagsangka sa Phoenix Pulse ug sa Blackwater Elite nga sugdan sa alas 4:30 sa hapon.
Ang Blackwater nga karon nakaangkon na sa serbisyo ni Bobby Ray Parks wa pa makabaton og kapildihan sa tulo ka duwa niini diin lakip sa ilang gipildi ang crowd favorite Barangay Ginebra nga ilang gipildi niadtong Mayo 24, 108-107.
Samtang mao usab kini ang unang duwa sa Phoenix. (JBM)