DAW gihiwa ang akong kasingkasing pagkasayod nga nagminyo ka, Marilou. Ingon sa ikamatay ko ang tumang kaguol sa imong gibuhat. Pagkawa moy igabawos! Sayod ka man unta giunsa ko ikaw pagmahal. Apan nganong ingon man niini ang gitugbang mo sa akong mga pagpangga? Tungod ba sa akong kakabos ug sa bati kong panagway?
Nasawod sa akong pandungog ang pagsulod mo sa salag sa kaminyuon gikan kang Reneta nga suod mong amiga nga akong gipakigkitaan sa gialagaran niyang kan-anan sa siyudad. Gikahimamat ug gikaila ko ang imong higala pinaagi ra usab kanimo. Gikan ta niadtong nanan-aw og sine ug giagni ko nimong mangadto ta sa Larsian, ang kan-anan nga gitrabahuan ni Reneta, kay buot kang magkaila kami.
Usa lang ako ka yanong magsusulat sa among dapit sa Lapu-Lapu. Nagtungha ako sa hayskol sa Babag, kanait nga barangay sa Gun-ob nga maoy akong gipuy-an, dihang nakat-on ako sa arte sa pagpanulat. Wala ko gayud lugaki ang mao kong talento hangtod nga nakatungha ako sa Cebu Central Colleges (University of Cebu na karon). Samtang ikaw, Marilou, usa ka tinun-an sa hayskol sa St. Paul School sa inyong lungsod sa Medellin dihang nagkaabot ang atong dalan tungod sa pagkadani mo sa usa ko ka sinulat nga napatik sa mantalaan nga nagbase sa kaulohan nga nagdala sa adres sa gitunghaan kong kolehiyo. Pagkabasa mo sa akong balak, wa ka maglangan, gisulatan mo ako kay buot kang makighigala kanako. Gibaslan ko usab ikaw ug mao toy sinugdanan sa atong panagsuod.
Milabay ang usa ka tuig ug nagpadayon ang sinukliay sa atong mga mensahe pinaagi sa sulat (kay wa pa man mauso niadto ang selpon ug internet). Gani, nagpadad-anay pa tag hulagway ug kay nadani man ako sa imong retrato, gidaygan ko ikaw sa akong gibati apan wa mo ako dawata kay buot mong magkahimamat una ta sa personal.
Disyembre kadto dihang nagkakita kita, Marilou. Balaanon ang mao tang panaghimamat kay diha man gyud kini sulod sa simbahan sa Sto. Niño. Nag-uwan-uwan niadtong higayuna sa gawas hinungdang diha na lang ta sa balay sa Diyos magkabildo.
Unya nagkasabot tang manggawas dihang mituang ang uwan. Didto ta mahimuntog sa usa ka pabugnawan sa dalan Colon. Apan ingon sa nabatyagan ko ang kabakikaw sa atong panag-uban tungod sa katalamayon sa akong hitsura nga labihang niwanga.
Gikan sa pabugnawan mipatighulog ta sa dalan Juan Luna (karon Osmeña Boulevard na) kay nakahukom kang mopauli na sa imong gisak-an sa Capitol Site ug nakigsakay ako kanimo sanglit may tuyo man usab ako sa usa ka sibyaanan sa Fuente.
Sukad niadto, Marilou, ingon sa kalit mihunob ang tanan. Wala na ako makadawat og sulat gikan nimo. Kon unsay hinungdan ikaw ray nasayod.
Sa dihang nakagradwar na ko sa kursong komersiyo sa CCC nakadawat akog suwat gikan sa imong manghod, si Malibe, nga nagpahibawo nga nakatrabaho ka sa dakong department store sa Colon hinungdang wa ko maglangan, giadto ko ikaw sa maong tindahan. Nakalitan ka ug natingala.
“Diin ka man masayod, John, nga ania ako dinhi?” nimo pa.
“Kang Malibe nga imong manghod,” tubag ko.
Human niadto, Marilou, nagkasabot ang atong kasingkasing. Nalipay kaayo ako nga gisugot mo bisan sa salawayon kong pamayhon. Apan naunsa bang sa pagpangapungil sa dahon sa panahon nahibaw-an na man lang nako nga kaslunon ka na!
Hinuon, pagka karon, inanay nang nahanaw ang akong kaguol sa imong pagbiya kay may lain na mang binuhat nga misapupo sa akong paghisukamod. Si Remedios, ang babaye nga tiunayng nagmahal kanako busa pagsagdi nga ilubong ko sa kalimot ang basuni sa atong kagahapon. (KATAPUSAN)