Kyaw-Kyaw: Final screening sa Ginoong Pilipinas Cebu

SEGURADONG daghan ang magsaulog sa Santacruzan karong adlawa tungod kay kini ang katapusang adlaw sa bulan sa Mayo.

Ang Santacruzan nagpadayag sa mga mithi ug mga birtudes sa Mahal nga Birhen Maria kang kinsa gihalad ang kabulakan isip rayna niini.

Malipayong pagsaulog!

•••

Usa seguro ko sa daghang nagsunod sa Pinoy Big Brother Otso nga nahingangha dihang gipalayas sa balay ni Kuya si Lance. Abi gyud nakog makasulod si Lance sa Big Four sa ilang batch.

Bisan wa gyud ko magsunod kada gabii pero nakatayming ko adtong gipasyut si Lance sa bola sa basketball 88 ka higayon samtang naglingkod sa swivel chair.

Nilampos siya pero nagasahan usab siya sa pagpakigkita sa iyang amahan. Pero bisan pa, giisip ko kadto nga dakong puntos alang ni Lance. Pero ang publiko may nagbuot. Wa tay mahims.

•••

Nakadayeg gyud ko sa pagkahimo sa Oratio Imperata batok sa sunodsunod nga pagpatay nga nanghitabo karong panahona.

Maayo kaayong pagkahan-ay sa maong pag-ampo. Makatandog sa pagbati ug makapabug-at sa pag-ampo.

•••

Sumala sa gipaabot, sila gyud si Dingdong Dantes ug Jennylyn Mercado ang mo-host sa umaabot nga Starstruck Season 7.

Kinsa kaha ang mosunod sa mga tunob ni Jennylyn, Mark Herras ug uban pang mga produkto sa maong bangga nga nahimong inilang mga bitoon sa syobis?

•••

Ugma ug sa sunod adlaw na ang final screening sa Ginoong Pilipinas Cebu: The Search for the Next Modern Day Hero. Sa Hunyo 12 ang Presentation of Candidates.

Mga ulitawong nag-edad og 18-27, may dugong Pinoy ug may gitas-on nga 5,10” pataas, kamo ang gikinahanglan ning maong bangga nga mopabalik sa mithi sa pagkabayanihon.

Sa interesado, tawagi lang ang numero nga 0999-301-8691 alang sa mga detalye. Basin ba diay kon swertehon.

Sa Septyembre ang finals diin ang mananaug maoy modala sa dungog sa mga Cebuano didto sa Manila alang sa national finals sa Oktobre. Upat ka mga titulo ang ilogan didto alang sa upat ka mga bangga nga international.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph