SUPERBALITA CEBU

Rabacal: Magkarambola sa Cebu city hall?

Pakabana

KON molingkud na si mayor-elect Edgar Labella gusto niyang himuon nang duha ka tuig ang validity sa business permit nga i-isyu sa Cebu City hall inay nga usa lamang ka tuig. Apan mag-agad kini sa mga sakop sa Bando Osmeña - Pundok Kauswagan (BOPK). Pun-an pa niining uban nga mga napiling konsehal ubos sa Barug PDP-Laban nga misimpatiya sa mga nangapilding konsehal, labi na sa north district, nga nangreklamo tungod sa mga isyu niadtong panahon sa kampanya apil na ang junking nga gihimo kuno sa usa ka kandidato nga ilang sakop.

Kini hinuong lakang ni Mayor-elect Labella gikalipay sa mga negosyante sa siyudad tungod kay kini business-friendly nga aksiyon.

Atong nasayran nga ang management sa SM Prime Holdings, Inc. (SMPHI) mibayad og P178.1 million sa real property tax (RPT) alang sa tulo ka tuig niadtong Mayo 14, 2019 kon usa ka adlaw human ang mid-term election. Ang City Assessor’s Office mipahibawo niini human ang iyang buhatan mihimo og re-assessment niadtong Marso. Wa magdugay sa pagbayad ang SM gawas lamang sa P5.4 million assessment alang sa water supply system nga ilang giprotestahan..

Nalipay si Labella sa gihimo sa city assessor’s office. Misaad siya nga magtukod og komitiba aron pag-examine sa RPT kay nagtuo siya nga adunay ubang mga negosyante nga wa mobayad sa hustong real property tax sa Cebu City. Kana maoy maayo, kobrahan ang tanan nga way pagpinig. Ako nagtuo nga dili mobabag niini ang mga kaatbang sa mayor tungod kay isyu kini nga maka-ayo sa dakbayan. Gipahibawo usab ni Mayor-elect Labella nga iyang bungkagon ang ang barangay mayor’s office tungod kay wa kini mahisubay sa balaud. Mahi-usa ba niya ang mga sakop sa Barug PDP-Laban?

Naa koy nadunggan nga morag mabahin kuno ang mga sakop sa Barug-PDP Laban. Ang katarungan kay si Vice Mayor-elect Mike Rama wa kuno makauyon sa liderato ni Presidential Assistant for the Visayas (OPAV) Secretary Mike Dino nga mao karoy giila nga maoy dakung lider sa PDP-Laban dinhi sa Sugbo. Kon mahitabo kini gikahadlukan nga maglain si Rama ubos sa Team Rama samtang magpabilin si Labella sa PDP-Laban. Tingalig la-inon na usab ni kanhi Cebu City mayor Alvin Garcia ang iyang partido nga Kugi Uswag Sugbo (Kusug) nga iyang gitukod 18 na ka tuig ang nakalabay.

Samtang mao kini ang tabi-tabi nga atong nasurikbot, manghinaut lang kita nga dili mahinayon pagkabungkag ang Barug PDP-Laban. Kinahanglang maghiusa sila alang sa atong pinalanggang Cebu City. (mannyrabacal1144@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph