GUMIKAN sa nahitabo ni Lawaan 3, Talisay City barangay captain Jimmy Bartelic, kinsa gipusil patay sa usa ka ex-US Marines, ang konsiho sa dakbayan pinaagi ni Association of Barangay Council (ABC) Federation President Marietta Bucao, mipasar og resolusyon nga maggahin og dakong kantidad aron ipalit og armas og i-apod-apod sa 22 ka mga barangay kapitan. Si Bartelic gipusil-patay ni Segundino ‘Dean’ Torrefranca sa dihang gihusay kini sa kapitan sa panag-bangi niini tali sa son-in-law ni Torrefranca nga si Jed Yabanez.
Patay usab sa pagpamusil si Ybanez. Napatay usab si Torrefranca sa mga pulis. Nagsunog pa kini sa iyang kaugalingon. Ang tumong sa paghatag og armas sa mga kapitan ang pagdepensa sa ilang kaugalingon batok sa mga tawo nga mo-interes sa ilang kinabuhi o gumikan sa kapiligro sa ilang trabaho. Kay matod pa risgo ang ilang trabaho. Risgo ba ang trabaho sa mga kapitan? Unsa diay ang papel sa mga kapitan? Risgo kon aduna silay kontra personal o may koneksiyon sa ilang trabaho.
Kining paghupot og armas usa ka pribilihiyo sa matag citizen sa atong nasud basta mosunod lang sa mga rekisito ug lagda ug qualified. Ang Philippine National Police (PNP) mao lamang ang bugtong ahensiya sa kagamhanan nga maka-isyo og lisensiya ngadto sa legitimate firearm holders. Daghang requirements nga i-comply sa gustong mohupot og armas o kining license to possess firearm (LTOPF).
Adunay advantage ug disadvantage ang paghupot og armas. Makadepensa ka sa imong kaugalingon batok sa mga dautang elemento ug kriminal nga mangahas sa pagkutlo sa imong kinabuhi. Apan sa pikas bahin, mao usab kini ang maghatod kanimo sa kaala-utan kay daghan ang mga naka-pusil o naka-patay nga wa untay plano nga mopatay. Apan gumikan kay adunay armas unya putong og ulo, nakapatay na hinuon.
Pero nganong gastuhan man gyud sa kuwarta sa mga magbubuhis ang paghupot og armas sa mga kapitan sa Talisay City? Priority ba kini? Nganong dili man lang papaliton ang mga kapitan og ilang kaugalingong armas aron ila na gyud na personal. Kay bisan dili na sila kapitan, ila gihapon mabitbit ang maong armas kay ila naman personal. (bobbygnalzaro@gmail.com)