SA IKADUHANG semana sa buwan sa Hunyo posibleng ideklarar na ang panahon sa ting-uwan.
Mao kini ang gibutyag ni Philippine Atmospheric, Geophysical and Astronomical Services Administration (PAGASA) Visayas officer-in-charge Engr. Al Quiblat.
Matod ni Quiblat nga makasinati ang Kabisay-an og normal nga pagbundak sa uwan sugod sa Hunyo.
“Expected timing onset of rainy season this year within normal but amount or volume of rainfall less that normal,” si Quiblat sa text message niini sa Superbalita Cebu.
Kini nagpasabot nga normal ra ang pagsulod sa panahon sa ting-uwan sa nasod apan, kuwang gihapon ang gidaghanon sa uwan nga matala gikan sa normal nga lebel niini.
Dugang ni Quiblat nga bisan paman kon mag ting-uwan na, nagpabilin gihapon ang weak El Niño phenomenon sa nasod diin moluntad kini hangtod sa buwan sa Oktubre.
Usa ang Central Visayas nga nakasinati sa epekto sa El Niño phenomenon diin moabot na sa dul-an P200 milyones ang kadaot sa agrikultura, usa niini nga rason ang grabe ka init ug ang kanihit sa tubig.
Ang El Niño, na-developed niadtong Oktubre 2018 maoy hinungdan sa nasinati nga drought ug dry spells sa pipila ka mga lalawigan sa nasod.
Ang Pagasa unang nibanabana nga lima ngadto sa walo ka mga bagyo ang masinati sa nasod gikan sa Hunyo hangtod sa Agusto karong 2019. (HBL)