HUMAN sa malampuson nga oil exploration sa lungsod sa Alegria, gipahibawo sa Department of Enegy (DOE) nga aduna’y gihimo karon nga oil exploration sa amihanang bahin sa lalawigan sa Sugbo.
Matod ni Energy Resource Development Bureau (ERDB) Director Jesus Tamang nga offshore ug onshore ang gihimo karon nga exploration.
Ang Forum Exploration mao ang kompaniya nga nihimo karon sa exploration.
Lakip sa mga dapit nga gihimoan sa exploration mao ang Libertad gas prospect sa dakbayan sa Bogo ug ang Maya prospect sa lungsod sa Daanbantayan.
Dugang ni Tamang nga dili na kini bag-o sa dakbayan sa Bogo tungod kay kaniadto aduna’y natural gas nga nakuha sa dapit apan nagamit rani sulod sa pito ka tuig.
Malaumon ang DOE nga aduna’y makuha sa amihanang Sugbo tungod kay sa Alegria, abunda kini sa produksyon sa krudo susama sa diesel ug gasolina diin posibleng mabaligya usab sa Sugbo.
Dugang ni Tamang nga aduna usab natural gas nga nakita sa maong dapit.
Tulo pa lang sa unom ka tabay nga ilahang gi-drill ang gigamit sa China International Mining Petroleum Co. Ltd.
Matod sa officer-in-charge sa DOE Visayas Engr. Jose Rey Maleza, nga nagsugod na og dispose ang operator niini sa ilang nakuha nga mga raw crude oil.
Sagad sa namalit niini anaa sa Luzon, gipasabot ni Maleza nga kinahanglan pa i-process ang maong raw nga crude oil sa dili pa ibaligya nga magamit sa publiko susama nianang itubil sa gasolina.
Apil sa mga nakabenepisyo sa lana sa Alegria mao ang local government unit, national government, lalawigan, munisipyo ug ang barangay diin 1% kini sa total sales sa maong operators. (HBL)