2 ka dakong mga kalihokan sa Lapu-Lapu saulogon karong Hunyo

NUNOT sa pagsaulog sa International Environmental Month ug Charter Day celebration sa dakbayan sa Lapu-Lapu sa buwan sa Hunyo, nagkadaiyang mga kalihukan ang giandam sa Lapu-Lapu City Government sulod sa usa ka buwan.

Subay kini sa Go Green Program sa kagamhanan sa dakbayan.

Matod ni Konsehal Rico Amores, chairman committee on environment, nga sugdan nila ang usa ka buwang selebrasyon karong umaabot Dominggo pinaagi sa ilang Fun Run nga motadlas gikan sa Lapu-Lapu City Hall paingon sa Brgy Ibo ug pabalik sa city hall.

Ang registration fee sa fun run P150, dala na niini ang singlet samtang P20 usab sa mga tinun-an apan ang ilang P.E uniform ang ilang suoton sa pagdagan.

Sa Hunyo 12 adunay ipahigayon usab nga “Scubasurero” diin ang nga nagkadaiyang scuba divers manglimpyo ilawom sa kadagatan sa Mactan.

Samtang sa Hunyo 17 nga mao ang charter day sa dakbayan ipahigayon ang Miss Go Green diin moabot sa 20 ka mga kanidata sa nagkadaiyang barangay ang magtigi sa naasoyng indigay.

Mga environmental custome ang gipaabot nga suoton sa mga kandidata sa naasoyng indigay.

Niining adlawa, ipahigayon usab ang awarding ceremony sa urban gardening sa mga urban poor association sa dakbayan.

Sa Hunyo 19 aduna usay ipahigayon nga coastal cleanup sa mainland sa dakbayan nga salmotan sa tanang barangay ug tanang departamento sa city hall ug ubang ahensya sa gobyerno.

Samtang sa Hunyo 29 mao usab ang coastal cleanup sa isla sa Olango.

Wa hinuoy tree planting atol sa tibuok buwan nga selebrasyon sanglit wala na gayuy lugar sa dakbayan nga mahimong katamnan pa sumala ni Amores nunot sa pagka highly urbanized city na sa dakbayan.

Gipasabot ni Amores ang katuyoan niining maong tanan mao ra gayud ang pag-edukar sa publiko sa kamahinungdanon pagprotehir sa kalikupan. (GCM)