PANSAYAN, kaligo-anan ug labhanan.
Lakip lang kini sa nag-unang mga pasilidad nga gikinahanglan panahon sa katalagman, ilabi na niadtong anaa sa evacuation center.
Apan kinsa ba’y magtuo nga lakip diay ang couple room sa mga pasilidad nga kinahanglangnon sa mga bakwit, nga biktima sa nagkadaiyang kalamidad.
Ang Provincial Disaster Risk and Management Office (PDRRMO) niawhag karon sa mga lokal nga kagamhanan lukop lalawigan nga ilakip na sa ilang response phase ug evacuation plans o mga programa sa DRRM ang pagbutang og couple room sa ma-identify nila nga mga evacuation center.
Sigun ni Rhee Telen, Jr., ang maong hisgutanan “less tackled” ug “less observed” kon maghisgot og DRRM.
Apan matod niya, importante kini kay katungod sa mga magtiayon nga mahatagan og pribadong panahon bisan ug anaa taliwala sa katalagman.
Gani, gihimug-atan ni Telen nga susama lang kini sa kabataan, duna designated playroom sa pipila ka evacuation centers, ang mga inahan dunay breastfeeding station ug mga person with disability duna’y dapit diin sila maka-access.
Gawas niini, gipadayag ni Telen nga tubag usab kini sa hygiene ug reproductive health needs panahon sa kalamidad, nga maoy gikampanya sa United States Agency for International Development (USAID) ug sa Department of Health, nga parehong nisuporta niini.
Matod niya, nabantayan nga daghan ang mga inahan nga mamabdos samtang anaa sa evacuation centers ug mao na hinuoy hinungdan nga malangay sa pag-recover gikan sa katalagman.
Subay niini, gipadayag niya nga available unya sa couple room ang reproductive health needs sama sa condom ug uban pang gigamit sa family planning.
Kini alang sa mga magtiayon nga nakalimot gikan sa ilang balay atol sa ilang pagbakwit.