MOBALIK na sab sa pagplano ang kampo ni Philippine marathon queen Mary Joy Tabal inig balik niini sa Sugbo gikan sa kampanya niini sa ScotiaBank Ottawa Marathon niadtong Dominggo sa Canada.
Sa tan-aw ni John Philip Dueñas, dugay nang coach ni Tabal, kinahanglang paspasan pa ni Tabal ang training niini.
Ang ace runner sa MotorAce Kawasaki Racing Team Tabal mihuman sa 42-kilometer race sa Ottawa Marathon sulod sa duha ka mga oras, 49 minutos ug 57 ka mga segundos nga igo lang sa ika-14 nga puwesto.
Gawas niini, pakyas sab si Tabal sa pagkuha sa Tokyo Olympic qualifying time nga 2:29.
Mas lisod na karon ang Olympic standard time ning higayuna kay giusab kini gikan sa 2:45 ngadto sa 2:29.
Asoy ni Dueñas nga makigtagbo siya kang Tabal karong Lunes aron tukion ang kabahin sa ilang plano sa Southeast Asian (Sea) Games.
Gipasabot ni Dueñas nga tinguha unta nila nga makarehistro og 2:40 sa Ottawa Marathon apan 2:49 ra ang ilan nakuha.
Matod ni Dueñas nga kinahanglang mosaka pa ang oras ni Tabal.
Niadtong 2016, si Tabal naka-qualify sa Rio Olympics human kini naka-oras og 2:43 sa nasod. (ESL)