DUHA ka tulog na lamang, back to school na ang atong mga kaanakan. Lipay ang mga estudyante kay dunay balon nga dili igasto kay magdula sa kompyuteran, migo. Dala siyempre ang paglikay sa mga hipusunon sa balay mao mora’g magbaguod na pod si nanay.
Bitaw, maayong aga nato! Glory to God, ningbalik na sa kalagsik ang akong kalawasan - hallelujah! Hanginunon man unta ko apan sa dihang naigo sa anemia- nag-apas ko sa akong gininhawa kay kulang og oxygen ang dugo nga nagaserkula sa akong kalawasan.
Wa gayud ko nangandoy nga magkasakit apan sa dihang ning abot kini; ako ra pod gidawat nga way pagpabugotbot. Responsibilidad man god natong pahimsugon ang atong mga kalawasan apan usahay (pirmi gani) natong maabusuhan.
Tuod, inig lain ang atong balatian, bisan fried chicken, lechon o beef caldereta kay dili makapabalik sa atong laming panglasa. Nagmantiner intawon ko’g sud-an og asukar sud sa duha ka semana pangontra sa suka ha ha!
Ang sakit mahimong panalangin kung kini makapahihumdom kanato sa atong pagpasagad nga desisyon ilabi na sa hustong nutrisyon. Nagpatambal gayud ko sa doktor ug ning agi’g daghang laboratory examination aron masayran nganong nagdaut akong lawas, igsuon.
Ang sugyot, hinayhinayon ug ampingan gayud ang kalawasan kay tungtong kuwarenta na ang kaedaran.
Ang asawa ni Job sa dihang anaa sa tungatunga sa kasakit ug pag-antus nag-ingon nga tungluhon ang Ginoo ug mamatay na (Job 2:9).
Sa maong pagsulay, na-“BREAK” o naputol o nawala ang pagtuo sa asawa ni Job sa Ginoo kay dili gayud pod masabtan ang pagsulay nga giaagian sa ilang pamilya.
Samtang si Job nagpangutana sa iyang kapikas kung ang mga maayong butang lang ba ang atong dawaton sa Diyos, og dili ang mga kasakit?
Namataya’g mga anak, nawad-a’g mga bahandi, nangagid ug nag- antus og taman apan wala ningbuhi si Job sa iyang pagsalig sa Ginoo. Gani, na-”BUILD” o mas nalig-on ang iyang pagtuo sa Diyos.
Sama nato, usahay maluya sa atong mga pagtuo tungod sa hagit sa kapalaran kanato. Dili gayud lalim apan dili lang pod nato kalimtan nga ang tanang pagsulay, gitimbang nang daan sa Ginoo aron makaya ra nato. Lami god ireklamo apan hinumdomi nga walay sipyat sa Diyos. Siya ang motabang, mogakus ug magpalig-on nato.
Himuang instrumento nga magpalig-on sa relasyon nato sa Ginoo ang mga hagit nga sagubangon nato. Amen?