DUNAY pipila ka mga magbabalaod sa ubos balay balauranan sa Kongreso nga nagpadayag na og interes nga mamahimong sunod nga House Speaker.
Kini human nga gitakdang motapos ang termino ni Speaker Gloria Makacapagal-Arroyo karong bulana.
Tinguha nga mogunit sa usa sa pinakagamhanan nga posisyon sa panggobyerno mao si Pantaleon Alvarez sa Partido Demokratiko Pilipino-Lakas ng Bayan (PDP-Laban) nga taga Davao del Norte, Aurelio Gonzales sa Pampanga, ug Lord Allan Jay Velasco sa Marinduque.
Mga kaalyado sab sa administrasyon nga nagtinguha sa posisyon mao sila si Peter Cayetano sa Taguig City ug Martin Romualdez sa Leyte.
Naa sab si Fredenil Castro sa Capiz sa National Unity Party ug si outgoing Senador Loren Legarda nagpadayag og interes sa pagka-speakership.
Apan karon pa lang daan, nalantawan na nga seguradong molingkod isip House Speaker kadtong kaalyado sa administrasyon.
Kay base sa pamahayag ni Senador Aquilino “Koko” Pimentel III, presidente sa political party ni Pangulong Rodrigo Duterte nga PDP-Laban, tinguha nila karon nga maangkon og balik ang liderato sa House of Representative.
Hinuon, si presidential spokesperson Salvador Panelo, sayo niini, nagsulti nga si Pres. Duterte di maglabot-labot sa bugno sa pagka-speaker sa Kongreso.
Bisan mismo ang Presidente nagsulti nga di siya manghilabot niini.