DAVAO DEL SUR -- Nangunay mismo ang pamuno sa Davao del Sur Police Provincial Office (DSPPO) sa pagtuyok sa dakbayan sa Digos ug ubang dapit sa probinsiya aron sutaon ang mga investment schemes nga daw uhong nga nanurok.
Si Colonel Alan Manibog, police provincial director, Huwebes sa hapon, Mayo 30, nanguna sa inspeksyon sa mga opisina sa mga investment schemes aron sutaon kon lehitimo ang pagbutang og mga buhatan sa probinsiya.
Daling gipakita sa Rigen Wellness Products Trading ang ilang permit nga gikan pa sa nasyonal nga buhatan sa Department of Trade and Industry (DTI) ug business permit sa munisipyo lakip ang permit sa Bureau of Internal Revenue (BIR).
Apan, usa ka buhatan sa Rigen sa dakbayan sa Digos ang gimandoang sirad-an hangtud di makompleto ang ilang mga dokumento nga maka-operate.
Gisusi sab sa kapulisan ang buhatan sa Crowd Royals Real State Services sa dakbayan sa Digos kinsa nagatanyag og car loan nga anaa lamang sa 25 porsiyento sa kinatibuk-ang kantidad sa sakyanan ang bayaran niini ug pag-abot sa 100 ka adlaw mamahimo nang maangkon sa usa ka nagpa-miyembro ang resibo, rehistro ug napiling sakyanan.
Daghan pa sa mga kompaniya ang susihon sa kapulisan ug ugaling makompirma nga ilegal ang operasyon ila kining ipaundang. (Orlando B. Dinoy)