DAW entry sa Guinness World Records ang natigayong libreng pakals sa Rizal Park sa San Pedro Street, Davao City Biyernes, Mayo 31.
Gikan buntag sayo padung panihapon, way putol ang linya sa Dabawenyo nga mipahimulos sa libre nga pagkaon nga gidalit sa lokal nga kagamhanan ning dakbayan.
Gawas niini, ang maong aktibidad gitumong sa birthday ni Davao City Mayor Sara Duterte-Carpio ug pasalamat usab sa kadaugan sa Hugpong Ng Pagbabago (HNP) kaniadtong milabay nga eleksyon.
Si manong Mando, 52-anyos, taga Boulevard, alas 9:30 pa lang sa buntag nag-atang na sa Rizal Park aron maka-una sa linya.
“Tagsa raman ni mao nga pahimuslan nato, birthday man pod ni Mayor,” pamulong ni manong Mando.
Usa ka 13-anyos nga babaye ang nakuyapan samtang naglinya ilalom sa kainit sa adlaw.
Sumala ni alyas Mercy nga kauban niini nga bisan og init, milinya gayud ang batan-on ug nasayran nga wala pod kini naka pamahaw gikan sa ilang balay.
Di usab apektado si alyas Nancy nga naay karenderia duol sa City Hall, kay bisan dunay libre nga pagkaon ang siyudad, daghan gihapon ang iyang mga kustomer.
“Dili gusto ang uban nga molinya, so diri sila sa amo mokaon,” saysay ni Nancy.
Misamot ka bibo kagahapon sa hapon dihang mipatim-aw si Mayor Sara taliwala sa mga naglinya nga Dabawenyo.
Malipayon ang mayor dihang iyang nakita nga nagsadya ang katawhan sa maong aktibidad.
Hinuon gwardiyado sa kapulisan ug mga sakop sa Task Force Davao ang palibot, anaa usab ang ambulansya sa 911 naka-estambay, Biyernes. (Richy F. Nalagon)