SO, BISAN og posibling dili man tuod matuman kadtong iyang proposal nga Light Trail Transit (LRT), apan sa gihapon hugtanon nga mosuporta si Presidential Assistant for the Visayas Michael Lloyd Dino niining pagtumaw karon sa monorail system nga giingon makatabang sa pagpakunhod sa problema sa trapiko dinhi sa Sugbo.
Kini human nga ang Davao City-based nga Udenna Infrastructure Corporation nga gipanagiya sa suod nga higala ni Presidente Rodrigo Duterte, ug ang langyaw nga partner niini, mipadayag sa ilang pag-usab sa proposal ngadto sa Department of Transportation (DOTr).
Ilang gipasabot nga gawas nga mokunhod ngadto sa P80 bilyones ang magasto niini nga katunga ra kon itandi sa gastuon sa LRT, mas haom pa kini tungod sa kagip-it sa mga dalan ilabi na sa Metro Cebu.
Ang monorail usa ka rapid transport system nga mosubay sa single rail ug sagad niini mag-agi sa ibabaw nga bahin.
Giangkon ni Dino nga dili man tuod ni kini sama sa light rail transit, apan aduna kini igong kapabilidad nga sama sa mahimo ra usab sa LRT.
Malaumon si Dino nga mapadali kining maong proyekto ug maindorsar gilayon kini nagdto sa Investment Coordination Committee sa National Economic and Development Authority alang sa technical review.
Nindot ning maong kalamboan kay morag mas klaro-klaro na ning proyektoha. Dili nato ikalimod nga pulos ra man gud mga plano ang madungog sa mga Sugboanon kabahin niini tungod niining sige og away sa atong mga leader.
Pero ning pagtumaw sa monorail system, dili kaha nga mao kini hingpit nga makapapas sa Bus Rapid Transit (BRT) ni Cebu City Mayor Tomas Osmeña nga hangtod karon nagpabilin gihapon nga plano?
Kinsa pa man kaha ang makapangusog sa pagpadayon niini ilabi na og mokanaog na si Osmeña sa iyang puwesto?