USA ka green sea turtle kun pawikan nga nabangalan sa usa ka Japanese diver sa Barangay Vicente, isla sa Olango niadtong Mayo 10 ang gipahimutang na sa University of San Carlos (USC) Marine Biology Research Station sa Barangay Maribago, dakbayan sa Lapu-Lapu sa Biyernes, Mayo 31.
Ang pawikan nga adunay gitas-on nga 56 centimeters ug gilapdon nga 52 centimeters gibanabanang motimbang og 12.5 kilos.
Matod ni Shelumiel Purisima sa Department of Environment and Natural Resources (DENR) nga dili na makatarong og langoy ang pawikan sa kadagatan sa Olango hinungdan nga gikuha kini og usa ka diver nga nakabangal ug gi-turn-over sa marine sanctuary sa Barangay San Vicente diin siya temporaryong gipahimutang sa wala pa gibiyahe sa Maribago.
Dako ang pagtuo ni Purisima posibleng dunay gihambing samad ang pawikan sa ilawom sa ulo niini hinungdan nga dili kini makatarong og langoy sa kadagatan.
Aduna kini samad sa iyang ulo gikan sa posibleng hait nga hinagiban o, matod pa sa opisyal sa DENR, posible nga kini nga gisuwayan og pana.
Subling giklaro ni Purisima nga gidili ang pagpana sa pawikan hilabi na nga ang green sea turtle maoy usa sa lima ka species sa pawikan nga naa sa kadagatan sa nasod.
Ang masakpang manakop o mamana og pawikan mabilanggo base sa Republic Act 9147 kun conservation and protection of wildlife resources and their habitats.
“Ang kini nga pawikan mosawom motakilid magsige ug tuyok nga tungod sa iyang imbalance so naay problema sa iyang buoyancy..." matod ni Purisima. (GCM)