PIPILA na lang ka adlaw magsugod na ang klase sa Lunes, Hunyo 3.
Ang Department of Trade and Industry (DTI) nitaho nga dunay 6% nga pagsaka sa school supplies karong tuiga itandi niadtong 2018.
Sa giluwat nga “Gabay sa Pamimili ng School Supplies” niadtong Mayo 25, nakita nga sagad sa writing pad papers ug intermediate aduna’y pagsaka sa presyo.
Matod ni Dinah Gladys Oro, senior trade and industry development specialist sa Cebu province nga nagsugod sila sa ilang monitoring niadtong Martes, Mayo 28.
Base sa suggested retail price (SRP) sa school supplies, sa kinatibuk-an anaa’y pagsaka sa P.25 nngadto sa P11.
Magdepende hinuon kini kon unsang klase sa school supplies susama sa krayola nga niabot sa P11 ang labing dako nga pagsaka nga natala.
Samtang, aduna’y lapis nga P.25 ra ang pagsaka sa presyo niini.
Makita ang kinatibuk-ang listahan sa SRP sa school supplies sa DTI website.
Pahinumdom ni Oro sa publiko hilabi na sa inahan nga mamalitay og school supplies sa ilang anak nga unta mamili kini ug manganvass sa nagkadaiyang brand ug presyo.
“Comapre quality and quantity,” si Oro nagkanauon.
Tambag usab niini sa mamalitay pa og school supplies nga non-toxic nga crayola ang paliton aron luwas sa mga bata o anak niini.
Usa sa nakitang rason sa pagsaka sa maong school supplies ang imported nga mga raw materials niini.
Init, uwan
Gawas sa mga gamit sa eskwelahan, payong ug balon nga tubig ayaw kalimti karong tingklase.
Kini ang pahinumdom sa buhatan sa Philippine Atmospheric Geophysical and Astronomical Services Administration (Pagasa) Mactan ngadto sa mga ginikanan, mga tinun-an ug sa mga magtutudlo alang sa pagbukas sa klase na karong Lunes, Hunyo 3.
Kay grabe ka init sa panahon sa buntag pa lang ug udto, apan posibleng makasinati og katag nga pag-ulan sa hapon.
Kini ang gitug-an ni Romeo Aguirre, weather specialist sa Pagasa Mactan.
Dugang ni Aguirre, nga mas maayo usab nga pabawnan og daghang tubig nga mainom ang mga bata ug magtutudlo, kay ang temperatura anaa gihapon sa 27 degrees Celsius ngadto sa 34 degrees Celsius.
Aduna kini heat index kon kainit nga mabatyagan sa tawo nga 42 hangtod sa 44 degrees celsius.
Gipasabot ni Aguirre nga ang hangin karon, imbes magsugod na unta ang habagat, nibalik kini nga gikan sa silangan ngadto sa habagatang silangan, hinungdan nga niminus na usab ang mga pag-ulan.
“Nibalik ta og East to Southwest ang atong hangin, and within the next 5 days East to Southeast gihapon siya, so mao ni, kali tog nihit atong ulan, imbes nagsugod na unta tog ulan-ulan 2 weeks ago. Wala pa gyud ka-establish ang atong pressure systems nga mao untay magpabali sa hangin (ngadto sa habagat), so nag-easterly siya og balik, mao ng init ta. And naa pa sad ang weak El Niño,” pagpasabot ni Aguirre sa Superbalita Cebu.
Aduna hinuon mga pundok sa panganod kon ang Intertropical Convergence Zone, dapit sa Eastern Visayas nga maoy nagdala karon og nga panagsang pagpanag-um ug pag-ulan.
Ang susama nga pagpanag-um usahay moabot sa Central Visayas ug mao hinungdan nga nakasinati kita’g hinay nga pag-ulan sa hapon o kagabhion, sugod sa Biyernes, Mayo 31.
Ang maong klase sa panahon masinati sa sunod semana, bisan walay mga major weather disturbance nga gi-monitor.
“Diri sa Central Visayas, magpasulabi gihapon ang kainit sa panahon, apan adunay chance sa mga localized thunderstorm, ilabi na sa hapon ug sa gabii, ilabi na nga adunay Intertropical Convergence Zone nga nakaapekto sa Eastern Visayas, so nagkataas atong tsansa sa localized nga pag-ulan,” saysay ni Aguirre.
Samtang sa pagtapos ning adlawa sa Mayo, way below normal ra gihapon ang natala nga pag-ulan, 14.2 mm lang nga ubos kaayo sa average unta nga 108.8 mm alang sa bulan sa Mayo.
Nakakuha og 13 percent sa kinatibuk-an. (HBL, FMD)