Tepora masubhan karon sa Amerika

 Jhack “El Capitan” Tepora ug si  Marlon “Nightmare” Tapales. (Hulagway tampo ni  Daniel Quindao Guden)
Jhack “El Capitan” Tepora ug si Marlon “Nightmare” Tapales. (Hulagway tampo ni Daniel Quindao Guden)

MABUNYAGAN na ang kontrobersyal nga Sugbuanong boksidor nga si kanhi interim World Boxing Association (WBA) Featherweight champion “El Capitan” Jhack Tepora og away sa Amerika karong adlawa (RP time).

Ikabagat sa walhon ug wala’y pildeng si Tepora (22-0, 17KO) si knockout artist Mexican/American Jose Luis “Relampago/Flash of Lightning” Gallegos, (16-6, 12KO) sa usa ka boxing promotion sa Soboba Casino sa San Jacinto, California.

Si Tepora, kinsa nag-training sa Amerika ubos sa paggiya ni kanhi world champion Rodel “Batang Mandaue” Mayol, si Tepora mitimbang og 127 lbs samtang si Gallegos mitibang og 128 lbs.

“Nalipay kaayo ko sir kay nakuha na nako ang timbang. Underweight gani ko karon, at least ba naluwas nako sa timbangay ug makakaon na tawon ug makainom nako’g tubig,” mensahe ni Tepora sa Superbalita Cebu.

Kahinumdoman nga naputos sa pagsaway sa online si Tepora niadtong Enero dihang na-cancel ang iyang away isip undercard ni Manny Pacquiao vs. Adrien Broner human nilapas siya’g lima ka libras.

“Excited nako para ugma ug dli lang kompiyansa kay maayo man sad bya akong kontra, almost one year maka fight na gyud ug usab unya ug ari pa gyud sa US, maninguha ko nga modaug ko para sa mga bashers nako kay sila ang akong inspiration,” panapos ni Tepora.

Sa pikas bahin ang laing boxer ni Mayol nga si Kapatagan, Lanao del Norte native ug kanhi WBO Bantamweight champion “Nightmare” Marlon “Nightmare” Tapales moaway sab.

Si Tapales (32-2, 15KO) makigbinukbokay ni Mexican Roberto “Azabache/Jet” Castañeda (23-11-2, 16KO) alang sa 10-round Featherweight non-title fight.

“Karong awaya kailangan ang focus para nindot ang duwa diin paningkamutan nako’g maayo nga modaog ko sa akong duwa,” pulong ni Tapales.

Si Tapales moaway sa ikaduhang sa Amerika ubos gihapon sa Rex “Wakee” Salud stable.

“Pasalamat ko nga sunod sunod ako fight diri pa gyud sa US busa akong paningkamoton nga ma knockout akong kontra para ma impress ang akung mga fans,” dugang ni Tapales.

Ang tagsatagsa ka away nila ni Tepora ug Tapales nahilakip sa undercard sa Hugo Centeno Jr vs. Willie Monroe Jr nga gidalit sa TGB Promotions ug isalida sa Fox Sports-1 Television. (Daniel Quindao Guden, US Correspondent)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph