MOABOT sa 59 ka mga tunghaan sa dakbayan sa Sugbo ang gipahibawo sa Department of Education (DepEd) 7 Schools Division sa Cebu City nga adunay problema sa supply sa tubig.
Ang DepEd 7 nipadala og suwat ngadto sa Metropolitan Cebu Water District (MCWD) aron pahibaw-on ang water utility sa problema.
Ang mga tunghaan nga apektado, mao usab kini ang mga barangay nga aduna’y problema sa supply sa tubig.
Si Charmaine Rodriguez-Kara, tigpamaba sa MCWD, nibutyag nga Mayo 27 dihang nipadala og suwat ang ahensiya kanila.
Mao kini ang semana human gipahigayon ang Brigada Eskwela.
Sila nagtuo nga nasinati kini atol sa pagpahigayon sa Brigada Eskwela o semana sa wa pa kini gipahigayon.
Matod ni Kara nga sa ilang gihimong assessment ug tungod sa pagsaka og balik sa supply sa Jaclupan Facility nga anaa na sa 24,000 cubic meters matag adlaw ang ma-supply, naulian na ang pipila ka mga eskwelahan niini.
Dugang niya nga aduna’y 10 ka mga tunghaan na lang ang ilang suplayan sa tubig.
Gisugdan nila kini pagpadala og water trucks aron makapundo og tubig sugod sa Biyernes, Mayo 31, hangtod sa Lunes, Hunyo 3.
Lakip sa mga tunghaan nga gihatdan og tubig mao ang Camputhaw Elementary School, Basak Community Elementary School, Basak Community National High School, Don Vicente Rama Memorial Elementary School, Don Vicente Rama Memorial National High School, Pardo Elementary School, Pardo Extension Elementary School, Pardo National High School, Mambaling Elementary School, ug Mambaling National High School.
Aduna’y pipila ka mga tunghaan nga nasuta sa MCWD nga di nila konsumidor ug ang uban wala’y storage facility.
Gipahibawo ni Kara nga kon makabutang og storage facility ang eskwelahan, mahatdan kini nila og tubig aron makapundo.