LAING disgrasya sa kadalanan ang nikutlo og duha ka mga batan-ong kinabuhi sa mga babaye niadtong Biyernes sa kaadlawon, Mayo 31, sa dakbayan sa Davao.
Subo palandungon gumikan kay mga biktima edad pa lang og 21 ug 27 anyos. Kini human nga ang gisakyan nilang kotse ug kasugat niini nga bus sa Davao Metro Shuttle nagkabangga.
Hinuon samtang gisuwat kini, wala pa matumbok ang tinuod nga hinungdan sa maong aksidente kay mga awtoridad padayon pang nihimo og dugang pagsusi sa hitabo.
Dunay mga komon nga hinungdan kon nganong mahitabo ang disgrasya sa kadalanan. Kini mao ang mechanical failure, human error o ba kaha tungod sa kahimtang sa panahon.
Apan sumala sa National Highway Traffic Safety Administration nga “94 percent of serious crashes are due to dangerous choices or errors” sa mga tawo nga maoy naggunit sa manobela sa sakyanan.
Busa alang niadtong nagmaneho og mga sakyanan, amping lang gyud kanunay. Kay bisan gani ang mga tawo nga way sakyanan, mahimo pa gani nga biktima sa disgrasya sa kadalanan, unsa na lang kaha kon ikaw gyud mismo maoy nagmaneho niini.
Ang pag-amping ug saktong pagdesisyon sa pagmaneho sa sakyanan maoy angay nga batonan diha sa kadalanan.
Usa lang ang atong kinabuhi, busa angay lang nato kining ampingan sa tanang higayon.