DAVAO DEL SUR -- Giabisohan na sa Food and Drug Administration (FDA) ang mga awtoridad ug publiko nga itaho gilayon kanila ugaling masiplatan ang mga processed pork meat nga “Ma Ling” sa merkado.
Nasayran nga temporaryong gi-ban sa merkado ang maong produkto human nga temporary sab nga gi-ban ang mga karneng baboy gikan sa laing nasud tungod sa African swine fever.
Sa gipaguwang pahayag ni FDA officer in charge Eric Domingo, gibutyag nga tumong sa pag-ban mao ang pagseguro nga dili mataptan sa virus ang nasud.
Sumala ni Domingo nga ang African swine fever, usa ka “highly contagious” nga sakit sa mga baboy nga motakod sa mga tawo.
Lakip sa mga gidili mao ang mga processed pork meat products ang gikan sa mga nasud Vietnam, Zambia, South Africa, Czech Republic, Bulgaria, Cambodia, Mongolia, Moldova, Belgium, China, Hungary, Latvia, Poland, Romania, Russia ug Ukraine.
Gitakdang molibot ang FDA Regulatory Board sa mga merkado aron maseguro nga way mapalit nga Ma Ling sa palibot.
Giawhag sab niini ang katawhan nga motaho sa ilang ahensiya kon mamatikdan ang mga produktong Ma Ling sa mga sari-sari stores ug groceries.
Ugaling mataptan sa sakit, makasinati ang usa ka indibiduwal og pagdugo sa panit, internal organs, way gana sa pagkaon ug kalintura. (Orlando B. Dinoy)