M’LANG, North Cotabato -- Usa ka hamtong ug duha ka menor de edad ang namatay sa panagbangga sa duha ka motorsiklo ug usa ka kotse alas 8 sa gabii niadtong Biyernes, Mayo 31.
Giila ang drayber nga namatay nga si Archie Toledo Sagcelo, 22, ulitawo, nagpuyo sa Barangay Saranay, Matalam.
Samtang mga menor de edad nga namatay sab nga angkas ni Sagcelo mao sila Fritzie Jean Peroy Morga, 15, ug Salcy Sanchez Dimaluan, 12, molupyo sa Purok 6, Barangay Dalipe.
Sa taho gikan sa North Cotabato Police Provincial Office, gimaneho ni Sagcelo ang iyang habal-habal nga motorsiklo sa Barangay Lika sakay ang duha niya ka pasahero.
Apan aksidente kining mibangga sa laing motor nga gitulod-tulod sa drayber nga si Joseph Molina sa kalsada nga nahutdan og gasolina.
Nalagpot daplin sa kalsada si Molina nga nakaangkon og daghang bun-og ug pangos sa nagkadaiyang bahin sa lawas.
Samtang ang habal-habal ni Sagcelo nibangga sab sa kasugat nga kotse nga dunay plaka LEY-809 ug gimaneho ni Benny Queman, station manager sa Radyo Bandera News TV ug FM Radio sa Midsayap, uban ang duha ka cameramen.
Patay on the spot ang duha ka menor de edad nga napasok ilawom sa kotse samtang dead on arrival sa M’lang District Hospital si Sagcelo.
Samtang luwas si Queman ug iyang mga kaubanan. (Edgar E. Fuerzas)