GIPRISO ang drayber sa Metro Shuttle Bus sa nahitabong bangga sa Quimpo, Boulevard, Davao City, Biyernes sa kaadlawon, Mayo 31.
Human migula sa social media ang kuha sa dashcam sa bus, daghang mga netizen ang mipagula sa ilang komento.
Giingon sa mga netizens nga di unta angay mapriso ang drayber sa bus gumikan maklaro sa video nga di sad-an ang bus sanglit ang Mazda Sedan gayod ang misugat.
Makita sa video nga naghaguros ang padagan sa kotse nga gimaneho ni Melody Ann Ybañez, 27-anyos, ug dunay sakay nga si Janilou Rosales, 21-anyos kinsa pulos dead on the spot sa maong hitabo.
Naghulat nalang ang drayber sa bus nga mopagula og disesyon ang mga kabanay sa mga nangamatay nga dili nalang kini prisohon ug dili kasohan.
Nangayo sab og pasaylo ang drayber sa bus ngadto sa mga nangamatay ug sa pamilya uban sa iyang mga pag-ampo.
Ning kasamtangan, balhog karon ang drayber sa selda sa Investigation and Detective Management Branch sa Davao City Police Office. (Jeepy P. Compio)