SECTIONS
Friday, August 23, 2019
SUPERBALITA CEBU

Super Blowout: ‘Duna na ko’y titulo’

USA ka makasaysayanong kalihokan ang nahitabo sa kinabuhi ni Dr. Danilo Gudelosao niadtong Lunes, Mayo 27, 2019.

Sa maong adlaw, siya nanumpa atubangan ni Presidente Rodrigo Duterte alang sa iyang promosyon isip full-fledged assistant schools division superintendent (ASDS) sa Cebu City Division sa Department of Education (DepEd).

Siya dungan nanumpa sa ubang mga opisyal sa gobiyerno nga na-promote usab sama niya.

Upat ka tuig ug walo ka buwan niya kini gipaabot.

“Today is the day that the Lord has made. Today is the big day I patiently waited for four years and 8 months! To God be the glory,” nagkanayon si Gudelosao sa iyang post sa iyang Facebook account.

Niadtong Mayo 22, gipirmahan ni Duterte ang iyang promotion subay sa rekomendasyon ni Provincial Schools Division Superintendent Dr. Rhea Mar Angtud, kanhi schools division superintendent sa siyudad sa Sugbo.

“Duna na ko’y titulo. Di na gyud ko OIC (officer-in-charge),” sumala ni Gudelosao.

Siya lumad nga taga lungsod sa Inabanga, lalawigan sa Bohol, niagi og kalisod sa iyang pagtungha sa elementarya ug high school.

Dihay mga higayon sa iyang pag-eskwela sa elementarya nga nagtiniil siya gumikan sa kalisod sa ilang pamilya.

Pagtungtong niya sa kolehiyo, nahimo siya nga Cardinal Vidal academic scholar sa Salazar Institute of Technology nga mas naila karon nga Salazar Colleges of Science and Institute of Technology.

Nag-part-time siya og trabaho sa maong tunghaan isip administrative staff aron dunay ikabawon ug ikagasto sa matag adlaw sa iyang pagtungha.

Pagka 1991, si Gudelosao nigradwar sa kursong Bachelor in Secondary Education major in Math sa SIT diin nagsugod siya og tudlo hangtod sa 1997.

Apan pagka Abril 7, 1997, nadawat siya sa Cebu City Division isip computer trainer hangtod nga nahimo siya nga OIC ASDS niadtong Septiyembre 2014.

Human sa 22 ka tuig, nagkakita og balik si Gudelosao ug ang iyang kanhi mga tinun-an sa 4th year high school sa SIT sa clubhouse sa Vista Grande, siyudad sa Talisay, niadtong Mayo 19, 2019.

Niapil usab sa panagtapok ang laing kanhi maestra sa SIT ug suod nga higala ni Gudelosao nga si Alma Languido, ug ang kapin sa 30 ka mga gradwado sa maong tunghaan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph