DUGAY na nga drayber og bus si Honesto sa rutang Bato-Cebu City-Bato. Daghan siyag suki nga pasahero kay paspas siya momaneho. Kon unsa siya kapaspas momaneho og bus mao usab ang iyang kaabtik sa babaye. “Basta drayber sweet lover!” panghambog ni Honesto sa matag dalaga nga ikaila. Tungod kay dili pilian dali ra siya makauyab.
Madasigon si Honesto nga modrayeb, labi na kon padulong sa Cebu City kay naghulat sa bus terminal ang iyang uyab nga si Aida. Gawas nga seksi, paraygon sab kini, mao nga paspasan ang pagpadagan sa bus aron dili mausik ang oras. Tungod kay kanunay silang mag-abot sa giabangan ni Aida nga ‘boarding house’ wala madugay nagsabak kini. Nanganak ang dalaga apan naputol ang ilang relasyon kay wala sila magkasinabot.
Human sila nagbulag si Aida, ang tindera sa terminal nga si Lorna mao na sab ang iyang gikalingawan. “Kon mosugot ka, ikaw na ang katapusang babaye sa akong kinabuhi,” esplikar ni Honesto samtang nagpaabot sa iyang oras sa pagbiyahe. “Hehehe! Ikapila na kaha ko nga ‘katapusan’?” pasiaw ni Lorna. Tungod kay maayo moatik nadani niya ang dalaga. Wala magdugay ang ilang relasyon human nagsabak si Lorna, kay wala siya motuman sa iyang saad nga pakaslan ang dalaga.
Milabay ang mga tuig. Nabangkaruta ang kompaniya sa bus nga gitrabahuan ni Honesto. Nag-drayber siya sa taksi.
Usa ka adlaw samtang nagmaneho siya padulong sa Adwana may mipara nga pasahero nga edad-edaran na apan mamords ug seksi pa gihapon.
“Ma’m, asa ta padulong?” matod ni Honesto nga nagtan-aw sa ‘side mirror.’
“Sa Langit,” tubag sa babaye.
“Asa bitaw, Ma’m?” ni Honesto nga nagtuo nga nangumedya ang babaye.
“Sa Langit Pension House god!” sa babaye.
Samtang nagdagan ang taksi miandar na sab ang pagka ‘chick boy’ ni Honesto.
“Pwede mag-textmate ta?” ni Honesto.
“Nganong dili? Ako si Fe, dugay na nga nabiyuda,” sa babaye nga mihatag sa iyang numero.
Human niya makaila si Fe kanunay na silang magteksanay hangtod nga nagkauyab. Usa ka higayon nasakpan ni Fe si Honesto nga may laing babaye nga ka-textmate. Gibulagan siya ni Fe tungod sa iyang gibuhat.
Milabay pa ang mga katuigan. Nagpabilin gihapon nga ulitawo si Honesto. Tungod kay palikero dili magdugay ang iyang relasyon sa matag babaye nga mauyab.
USA ka higayon, samtang nagpalabay sa kagabhion sulod sa usa ka ‘bikini bar’ gikaila ni Honesto si Ligaya. Batan-on kini ug seksi, puti ug hamis ang kutis sa pamanit. Kon kanus-a hinuon siya matigulang karon pa siya mobati og tinuod nga gugma sa usa ka babaye. Nahimo siyang suki nga kustomer ni Ligaya hangtod nga nagkauyab sila ug namunga ang ilang pagminahalay.
“Nagsabak ko. Tulo na ka bulan!” tug-an ni Ligaya nga nabalaka sa iyang kahimtang.
“Ayawg kaguol kay pakaslan tika!” ni Honesto nga nalipay.
Usa ka buntag giparada ni Honesto ang iyang taksi atbang sa Cebu Metropolitan Cathedral kay may pasahero nga nagpahulat. Nahibulong siya dihang nakita niya si Ligaya nga kauban ni Aida, ang iyang uyab kaniadto. Nagbarog ang duha atubangan sa simbahan. Mikanaog si Honesto sa taksi ug miduol sa nahimutangan nilang Ligaya ug Aida.
“Aida, kumusta ka? Kaila diay mo ni Ligaya?” matod ni Honesto nga nahibulong.
“May pamilya na ko. Si Ligaya ang bunga sa atong pagminahalay kaniadto,” tug-an ni Aida.
Daw natuk-an si Honesto sa iyang nasayran. Si Ligaya wa usab mahimutang kay di makatuo sa iyang nadunggan gikan sa iyang inahan.
“Mag-estorya unya tag usab, kay miabot na ang pasahero ang pasahero nga akong gihulat,” ni Honesto nga daling nanamilit ug milakaw.
Pagka gabii nag-inusara nga nag-inom og alak si Honesto sulod sa iyang lawak. Nagmahay siya sa iyang nabuhat. Gikuha niya ang usa ka pistola gikan sa kabinet ug gi-um-om ang sumbohan niini dayong kablit sa gatilyo. Bang! Usa ka masipang buto ang mitugaw sa kahilom sa kagabhion. (KATAPUSAN)