Vallena: Bisyo na

SA WA pa ko magbiseklita, di ko maka-appreciate aning two-wheeled nga sakyanan nga tindakan. Dihang nagpangutana ko sa presyo, nangsiga akong mga mata kay gimahalan ko sa P8,000 nga mountain bike. Nagtuo ko nga nindot na kaayo ang akong napalit. Mao to ang una nakong MTB.

Ug sa dihang nagkuyog kuyog na ko sa akong mga higala ug hinayhinay nga nakat-on sa mga parts, didto ko nakaamgo nga ubos ra gani kaayo ang akong napalit.

Unsay akong gihimo? Nag-upgrade. Nagtuo ko nga maayo na ang akong napalit nga groupset kay P10,000 ang akong nagasto. Apan akong naamguhan nga ubos diay gihapon ni. Wa dayon ko mo-upgrade, nagpabarog ko og laing biseklita alang sa akong anak nga mas maayo og specs kay Deore na ang akong gipamutang.

Ang nahitabo nako kaniadto, mao usab ni ang nakaigo sa ubang mga mahiligon sa biseklita, labina niadtong bag-o lang nga naungo. Apan dunay uban, sama sa pipila nako ka mga higala, nga di mahimutang kon di maka-upgrade kada unom ka buwan.

Alang nako, ang pagsige og ilis og parts usa na ka bisyo nga kon di ka kahibawo mo-handle, makabuslot og bulsa. Kon imong paundayunan, wa kay matigom o mahurot ang imong tinigom nga kwarta.

Gikinahanglan ba?

Dunay usa ka babayeng blogger sa Europe nga nag-promote sa biseklita isip alternatibong transportasyon. Iyang gihisgutan sa paghimo sa biseklita nga status symbol sa pipila ka mga biker. Sakto kaayo siya kay bisan diri sa Cebu, ang mga adunahan mag-grupo. Imong makita ang nindot nga frames ug grupo sa mga dapat. Naay uban nga sama nag presyo sa usa ka awto ang ilang biseklita. Gawas nga titanium ang frame, ang mga dapat puro high-end. Daghan sab hinuon aning mga tubigan, grabe makagamit sa ilang biseklita, apan naay uban nga pang status symbol lang.

Tinuod baya nga di ka kinahanglan nga nindot kaayog biseklita sa pagsikad. Apan kon hilig ka og trail ug ang imong mga agianan bati, nagkinahanglan ka og lig-on nga mga dapat, labina sa imong wheelset ug fork.

Hangyo

Kon ikaw gusto mo-upgrade, apan mixed sa used ug brandnew, seguroa nga ang second hand di na used kaayo. Naa man guy mga tawo nga grabe makahangyo unya mangitag very good condition, high end nga dapat. Asa man ka mangitag high end ug very good condition nga baratuhon?

Nitagam na ra ba ko kaniadto, nagbaligyag parts pero grabe makahangyo ning ubang buyers. Kuwang na lang gamay pangayuon ang butang. Hangyo lubo, lubag pa gyud.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph