Diola: Layo nga duol

Fr. Carmelo Diola

Binasi sa Mga Buhat 1:1-11; Salmo 47; Taga Efeso 1:1-7, 11-13; Lucas 24:46-53

KARONG mga panahona daghang teknolohiya nga nagapaduol sa mga tawo nga layo sa usag-usa. Nagsugod kini sa email nga maoy nakapakunhod sa gidaghanon sa mga tawo nga moadto sa ‘post office”. Dili na mistil pang mopalit og “stamp”. Miabot ang “Skype” ug uban pa diin madungog ang tingog ug maoy mipuli sa “long-distance telephone”. Gisundan kini sa “Messenger” nga midugang og nawong nga makita sa tingog nga madungog. Mga tambal kini sa kamingaw nga nagapaduol sa mga nahilayo.

May duha ka yugto ang ebanghelyo. Gihisgotan sa nabanhawng Jesus ang iyang pagkabanhaw ug ang kapasayloan sa sala nga isangyaw sa iyang ngalan. Apan usa kini mahitabo kinahanglan hulaton sa mga tinun-an ni Jesus nga sila “pagasul-oban og gahom gikan sa kahitas-an”. Human niini gihisgotan ang pagkayab mismo ni Jesus ngadto sa kalangitan ug ang pagsimba nila kang Jesus ug ang ilang pagmaya.

Nalipay ang mga sumusunod ni Jesus kay bisag gibiyaan niya sila, nasayod sila nga bisag halayo na siya, duol lang gihapon siya pinaagi sa Espiritu Santo nga mao ang “gahom gikan sa kahitas-an”. Mao kini ang kahulogan sa pagkayab ni Jesus sa kalangitan. Milayo siya apan mipahiduol na hinuon.

Giklaro sa Mga Buhat sa mga Apostol nga ang gahom gikan sa kahitas-an mao ang Espiritu Santo. Gihatagag dugangdetalye ang pagkayab ni Jesus nga gihisgotan sa ebanghelyo ni Lucas. May duhaka lalaki ang mitumaw, mga anghel kini sila, ug miingon: “Mga taga-Galilea, nganong nagabarog man kamo dinha ug nagasud-ong sa langit? Kining Jesus nga gikuha gikan kaninyo nga mikayab sa langit mobalik sa samang paagi nga nakita ninyo siya nga miadto sa langit”. Moabot sad diay ang panahon nga mobalik mismo si Jesus.

May gidugang pa ang sulat ngadto samga taga-Efeso. Pinaagi sa Espiritu Santo, gihatag ni Jesus ang mga gasa, “isip mga apostol, uban isip mga propeta, ang uban isip ebanghelists...aron pagtukod sa lawas ni Cristo, hangto makab-ot nato ang panaghiusa sa pagtuo ug kahibalo sa Anak sa Dios, ngadto sa hamtong nga pagkatawo...” Karon pa man diay duol nato si Cristo bisag layo kay kita mismo ang mga sakop sa lawas ni Cristo. Kita gibuligan og mga gasa aron mahimo tang hamtong diha sa espiritu.

Karong adlawa gisaulog nato ang pagkayab ni Jesus sa kalangitan. Layo siya kay mibalik siya sa kalangitan, sa kilid sa Langitnong Amahan. Apan duolsiya pinaagi sa Espiritu Santo. Diha sa atong pagpakigsuod sa usag-usa ug pagpaambit sa atong nadawat nga langitnong gasa, ang lawas ni Jesus nalig-on ug daw ania pa siya.

May kasinatian ba kita sa pag-ampo nga daw haduol si Jesus bisag naa siya sa langit karon?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph