NAA gyuy mga tigsuporta sa og ningdaog nga mga politiko nga grabi makabiay-biay sa mga tigsuporta sa mga napildi. Makita nato kini sa Facebook. Apan ang ngil-ad mao kining mobiay-biay sa mga nagtrabaho sa Cebu City Hall ug sugsogon kon kanus-a mamutos kay silay mopuli.
Di man lang kadaogan ang gitinguha niining mga tawhana. Gusto man sila nga ang mga tigsuporta sa kaatbang di lang kulban sa kulon, bugalbugalan pa gyud. Lupig pay paludhon.
Pareho man kini sila sa mga sundawo ni Daenerys sa Game of Thrones nga padayong nanghasi sa Kings Landing bisan og nangsurender na ang kontra.
Ambot kon duna bay makabadlong kanila kay duna man say modepensa nga walay labot ang mga lider.
SRP
Madayon na ba ang giingong consortium sa SM, Ayala, ug Filinvest nga giingong nakapalit og dakong pahat sa SRP sa panahon ni kanhi Mayor Mike Rama ug gitinguhang mabalik sa Syudad sa Sugbo ni outgoing Mayor Tomas Osmena?
Atong nabantanyan nga daw nagpanikad na ang pipila ka mga konsehal sa Partido Barug labi na nga dunay gipaabot ang Siyudad nga moabot og P14 bilyones isip bayad.
Bahala nang niingon si Mayor Osmeña nga barato ra kaayo kini kay siya makabaligyag mas mahal. Napildi man gud siya sa pili-ay ug busa nagtuo kita nga wala nay makababag sa maong transaksyon
Apan atong nabasahan ang usa ka centerfold ad sa tanang mga mantalaan dinhi sa Syudad sa Sugbo nga naghisgot niining mga hinungdan nganong giingon ni Mayor Osmena illegal ang maong transaksyon.
Kining maong mga rason iya na diay nga giduso ngadto sa Commission on Audit (COA) kaniadto pang 2017.
Lig-on ang maong mga basehanan ug nagtuo ko nga kon modaog man ang Labella administration ug ang giingong consortium, di kini maresolba sa COA hangtod moabot sa Korte Suprema sulod sa tulo ka tuig.
Dayon, gikinahanglan pa sa Labella administration nga ma-neutralize ang Konseho nga ang mayorya mga sakop sa BOPK.
Monorail
Dako akong kalipay nga nausab ang hunahuna sa Udenna, ang kompanya sa negusyanteng si Dennis Uy, nga imbes Subway-LRT iyang iduso sa DOTR nga proyekto alang sa Sugbo, usa ka monorail na iyang gihunahuna karon.
Unang rason nganong uyon ko sa monorail kay katunga ang kabarato niini itandi sa Subway-LRT. Dayon, mas ma-integrate pa kini sa proyektong Bus Rapit Transit kun (BRT) sa Syudad sa Sugbo
Nasiguro man gud ko nga kining iduso sa Udenna mao gyud ang suportahan ni Presidential Assistant Mike Dino busa siguradong madayon kini labi na nga iyang mga kaalyado ang nakadaog sa Syudad ug alawigan sa Sugbo. (@anol_cebu sa Twitter)