HAPIT na sab ting-uwan, matod sa Philippine Atmospheric Geophysical Astronomical Services Administration (Pagasa). Basin tunga-tunga-tunga ning buwana, modeklarar na sila og ting-uwan na.
Ning pagsigeg uwan, medyo naulian na ang supply sa Jaclupan dam apan di pa sa iyang naandan. Kada ting-init, ang suliran sa tubig magbalikbalik.
Sa northern Metro Cebu, di kaayo dako ang problema sa supply sa tubig sukad nga nag-supply na ang Cebu Manila Water Development sa Carmen. Mas dako ang problema sa south nga kasagaran nagsalig sa Jaclupan ug Buhisan dams kay gamay rag tinubdan.
Tungod sa problema sa supply sa tubig, si Governor-elect Gwendolyn Garcia gusto nga gamiton ang kasapaan sa southern Cebu nga tinubdan sa supply. Bitaw, daghan sa mga river system sa southern Cebu nga di mahubsan bisan panahon sa ting-init. Mao gani ni ang kaligoanan niadtong mga tawo nga gusto og bugnaw nga tubig panahon sa summer.
Di lisod ang paghimo niini kon duna lay kwarta nga I-invest aron kini mahimo. Kon nahimo kini sa northern Cebu, nganong di man sa southern Cebu? Di kini imposible ang nahuna-hunaan ni Garcia. Mas maayo gani unta nga kaniadto pa kini gihimo.
Seguruon usab ang pagpanalipod sa nahabilin nga kalasangan sa mga dapit nga nailhang dagkong mga tinubdan. Kay ang kaabunda sa tubig sa dapit nagdepende usab sa kahimtang sa kakahuyan. Namatud-an na kini sa mga dapit sa kalibutan, diin sa baga nga kakahuyan, naa ang abundang supply sa tubig.
Pinaagi sa pag-atiman sa kalikupan, mamahimong malungtaron ang supply sa tubig.
Duha diay ang igo niini. Mapanalipdan ang kahimtang sa kalikupan ug maseguro nga di dayon mahutdan sa tubig ang mga Sugboanon bisan sa taas nga ting-init.