MOABOT sa P999,702.96 ang nagasto ni Congressman-elect Vincent Franco “Duke” Frasco sa pagpangampanya sa miaging piniliay niadtong Mayo 13.
Kini base sa Statement of Contributions and Expenditures (Soce) nga gisumitir niini ngadto sa Office of the Provincial Election Supervisor (OPES) sa Commission on Elections sa Kapitolyo niadtong Huwebes sa hapon, Mayo 30.
Sa iyang giduso nga Soce, si Frasco nigasto og P264,500 isip compensation sa iyang 31 ka campaigners, clerks, stenographers, messengers ug ubang indibidwal nga iyang gipatabang sa kampanya.
Ang umaabot nga kongresista sa ikalimang distrito sa Sugbo nakabayad usab og P247,042.44 sa pag-promote sa iyang kampanya sa newspaper, radyo, TV ug ubang advertisements apil na sa internet sama sa Facebook.
Sa kapin P247 mil, P139,631.84 ang iyang nabayran sa Facebook alang sa mga transaksyon gikan sa Marso 28, 2019 hangtod sa Mayo 13, 2019.
Nigasto usab si Frasco og P120,000 alang sa honoraria sa lima ka mga abogado ug siyam ka paralegal ug P80,000 nga bayad alang sa 80 ka poll watchers.
Nibayad usab kini og P180,000 sa printing ug distribusyon sa campaign materials; P50,000 sa sound systems, mga dekorasyon, ug mga suga sa ilang political meetings ug rallies; P40,000 alang sa printing sa sample ballots; P12,370.02 gasto sa iyang mga biyahe ug campaign personnel atol sa kampanya ug P5,790.50 bayad sa paggamit og telepono, pagpa-load sa mobile phone, internet access, postages freight ug courier.
Si Frasco ang labing una nga nakaduso og Soce sa tanan nga nikandidato sa provincial level sa nakalabay nga eleksyon.
Bisan kon miyembro siya sa Lakas-Christian Muslim Democrats (CMD), apan wa siyay nadawat nga cash o in-kind contributions gikan sa iyang partido o sa ubang mga tinubdan nga magamit sa iyang pagpangampanya.
Si acting Cebu Provincial Elections Supervisor Jerome Brillantes unang nipahibawo nga kinahanglan mosumitir sa ilang mga Soce ang tanang nidaog ug napildi nga mga kandidato sa dili pa ang Hunyo 12 nga tagal.
Ang elected nga mga opisyal nga mapakyas pagduso sa ilang Soce dili tugtan nga makalingkod sa puwesto.
Ubos sa Section 13 sa Republic Act 7166 kun Synchronized National and Local Elections Law, ang usa ka kandidato nga magpapili pagka presidente ug bise presidente gitugotan nga makagasto kutob sa P10 ang sa matag botante, P3 alang sa mga kandidato sa laing mga position kon dunay partido, P5 kon independente nga mga kandidato ug P5 sa mga political party sa matag botante. (SCG)