DRAYBER sa traysikol namatay samtang iyang asawa kritikal human sila nabanggaan sa van nga gipanag-iya sa punerarya nga gikan naghatud og patay Sabado sa kaadlawon sa national highway sa Brgy. Baliwagan, lungsod sa Balamban.
Si Albith Dumpa, 28, minyo, taga Brgy. Baliwagan namatay samtang gidala sa tambalanan.
Kritikal ang iyang asawa nga si Jena, 31, human nakaangkog grabing kadaot sa ulo ug kalawasan.
Gitanggong si Jemuel Sasis, 23, ulitawo, taga Brgy. Owak, lungsod sa Asturias, driver sa L300 van nga iya sa Saint Francis Funeral Homes.
Si Police Staff Master Sgt. Rolando Navarro, sa Balamban Police Station nga nahinabi sa Superbalita Cebu, nagkanayon nga ang magtiayong Dumpa sakay sa ilang traysikol padulong sila sa lungsud sa Asturias kay mangaligog dagat kay birthday sa ugangan sa namatay.
Samtang nagsubay sa highway, gikasugat nila ang naghaguros nga van, head-on-collission.
Wa mahitsura ang traysikol samtang mga biktima nangalagpot sa kakusog sa impact.
Matod ni Navarro nga nakatulog si Sasis samtang nagmaneho ug nakamakata dihang nakabangga na sila sa trasikol.
Niangkon si Sasis nga lapoy kaayo siya gikan naghatud og patay sa dakbayan sa Bogo hinungdan nga siya nakatulog samtang nagmaneho.