MOABOT sa kapin sa P20 million nga balor sa ilegal nga drugas ang nasakmit sa kapulisan sa Siyudad ug lalawigan sa Sugbo atol sa managlahing mga anti drug operation sa Biyernes sa gabii, Mayo 31, ug Sabado sa kaadlawon, Hunyo 1.
Unang nasikop sa mga sakop sa Mambaling Police Station inabagan sa Drug Enforcement Unit sa Cebu City Police Office ang 23 anyos nga lalake sa sitio Bayutan Barangay Duljo Fatima, Siyudad sa Sugbo pasado alas 9, Biyernes sa gabii.
Ang suspek giila nga si Richard Barbosa, alyas Butong, taxi driver, kinsa nakuhaan og 1.675 kilos sa gituohang shabu, kantidad og P11,390,000.
Nalakip sa high value target si Barbosa sa Mambaling Police Station ug taod-taod na nga gipanid-an sa kapulisan.
Gipaubos pa sa imbestigasyon sa kapulisan si Barbosa kinsa ang nag-supply kaniya.
Aduna silay kasayuran apan ila pang palawman alang sa umaabot nga follow-up operations.
Sa laing mga operasyon sa CCPO, nakasakmit sila og kinatibuk-ang laing 789 gramos sa gituohang shabu nga balor og kapin sa P5 milyunes.
Mokabat sa 42 ka warrants of arrest ang ilang gi-serve, apan 30 ra ang napatuman.
Nakadakop ang kapulisan og 29 ka mga tawo, sagad drug related ang kaso.
Marijuana Plantation
Samtang gironda usab sa mga sakop sa Toledo City Police Station ang usa ka marijuana plantation sa sitio Himatogan, Barangay Captain Claudio sa siyudad pasado alas 5 sa buntag sa Sabado.
Moabot ngadto sa 10,000 ka fully grown nga mga punoan sa marijuana ang ilang naibot, gibana-bana nga mo balor ang tanan og P 4,000,000.
Nasikop hinuon sa kapulisan ang giingong nag tanom sa marijuana nga giila nga si Elmer Cantutay Jr., nagpuyo duol ra sa plantation.
Matod ni Police Lieutenant Colonel Janette Rafter, hepe sa Toledo City police, duha ka semana nilang gipangita ang marijuana plantation human sila makadawat og impormasyon gikan sa mga concerned citizen.
Sa dihang nagpositibo ang ilang surveillance ug natultolan ang mga pananom, ila gilayon nga gilusad ang operation.
Giingong taodtaod na sa illegal nga negosyo si Cantutay sanglit mabantayan kini sa gidak-on sa iyang balay.
Sa mga namuyo sa sitio Himatogan, ang iya rang balay ang labing nindot.
“Kapila nana ma uprotan dihag marijuana. Katong the other week naay nag info namo nga naa napud daw gitanom. Mao tong amoang gipaadtoan og tawo didto, nag positive man. Mao tong among gipa identify kinsa ang planter ug gi monitor pa namo siya,” matod ni Rafter.
Ang pagkasakmit sa kapin sa P20 million nga balor sa illegal nga drugas kabahin sa synchronized enhanced managing police operation (Sempo) nga gilusad sa kapulisan sa Sugbo sulod sa 24 oras.