GILIHIAN og unanimous decision nga kadaugan sa Amerika ang kontrobersyal Cebuano boxer ug kanhi interim World Boxing Association (WBA) Featherweight champion “El Capitan” Jhack Tepora sa iyang away sa Soboba Casino sa San Jacinto, California Dominggo, Hunyo 2 (dinhi sa Pilipinas).
Sa pagsugod pa lang, gipukpok na ni Tepura gamit ang right hook ug left straight combination si Mexican knockout artist Jose Luis Gallegos apan bisan pa niini, wala kini maunsa.
"Lig-on gyud kaayo akong kontra. Bisan giunsa nako dili gyud madala busa namuntos nalang ko para makatigom ko’g maayo kon mahuman ang 10 rounds fight namo,” padayag ni Tepora nga nahinabi sa Superbalita Cebu via video chat.
Giangkon ni Tepora ning tigbalita nga kusog sab ang iyang kontra.
Gani adunay higayon nga gisakitan siya human naigo sa Mexican boxer.
“Nakakat-on ko ani awaya nga dili magdali kay usahay bisan unsaon dili gyud ma knockout ang kontra. Pasalamat gyud ko ni coach Rodel (Mayol) kay iya ko gidisiplina, " panapos ni Tepora.
Mopahuway una siya’g usa ka semana aron mobalik pa'g training uban ni Mayol sa pamasin mahinayon siya isip undercard sa Manny Pacquiao vs Keith Thurman karong Hulyo 20 sa Las Vegas, Nevada.
Gumikan sa kadaugan ni Tepora, misaka ang iyang baraha sa (23-0, 17KO) samtang midahili si Gallegos sa (16-7, 14KO).
Sa pikas bahin, ang laing boxer ni Mayol nga si Kapatagan, Lanao del Norte-native ug kanhi WBO Bantamweight champion “Nightmare” Marlon “Nightmare” Tapales mipaundang sa kontra pinaagi sa knockout sa 3rd round.
Malabong kombinasyon ang gibuhian ni Tapales nga mi knockdown sa unang round sa kontrang Mexican, Roberto Castañeda.
Nibangon ang kontra hangtod nga nakahuman sa second round apan sa round number 3, si referee Ray Corona nipaundang sa away sa oras 1:37 human wala'y hunong nga gidabo-dabohan ni Tapales si Castañeda.
Ang ikaduhang kadaugan ni Tapales sa US naghatod kaniya sa (33-2, 16KO) samtang nalusno ang baraha ni Castañeda sa (23-12-2, 16KO).
Si Tapales nga ubos gihapon sa Rex “Wakee” Salud stable-Cebu unang miaway ug midaug batok ni Fernando Vargas Parra niadtong Pebrero 16 sa Microsoft Theatre sa Los Angeles California.
“Lipay kaayo ko ug satisfied kaayo ko sa ilang performance ni Tepora ug Tapales,” hamubong chat online ni Mayol sa Superbalita Cebu human sa fight. (Daniel Quindao Guden, US Correspondent)