NAMELIGRONG mawagtang ang Misamis Oriental Cares Sytem, usa ka programang panglawas ni Misamis Oriental Governor Bambi Emano alang sa katawhan sa lalawigan.
Kini ang gibutyag ni Sangguniang Panlalawigan Board Member Prexy Elipe atol sa iyang usa ka programa sa radyo niadtong adlawng Sabado, Hunyo 1, 2019, nga mao ang Baruganan.
Si Elipe napilde sa pagka bise gobernador sa bag-ong piliay ug kutob na lamang kini karong umaabot Hunyo 30 sa iyang pagserbisyo.
Gipaabot niini nga isip usa ka overseer sa MisOr Cares program nagpatawag siya og usa ka meeting aron hisgotan kung unsay sangputananan sa health service sa lalawigan human "under threat" o nameligrong mawagtang human sa niaging piliay midaog ang ilang kaatbang.
Si Board Member Jigjag Pelaez maoy napiling bise gobernador ug usa ka Board Member nga mao si Jessa Mugot nga giingon ni Elipe nga niadtong kampanya nga daw nagsige og ingon wagtangon ang programa sa MisOr Care.
"Nahadlok kita karon nga basin ang SP kay lahi na nabilin ug iyang babagan kay mao na ilang pronouncement nga kung sila mapili undangon ang Misor care," matud ni Elipe.
Posibleng mahatagan kini og katumanan human nga sila napili karon sa piliay.
Dugang ni Elipe nga magpadayon siya sa pagpanerbisyo taliwala paman nga napilde sa piliay ug nangandam kon unsa man gani sangputanan niini nga programa.
"Among gipangandaman nga unsay mahitabo kon undangon kay basin makurat ang katawhan," dugang niini.
Hinoun atol sa proklamasyon sa Comelec ni Board Member Jigjag Pelaez iyang gibutyag nga isip napiling bise gobernador sa lalawigan iyang suportahan ang mga programa ni Governor Bambi.
Una na nga gibutyag ni Emano nga unsay problema sa MisOr Cares nga wagtangon nga nakatabang kini ug nakahatod 1.5 milyon nga serbisyo sa Misamisnon sulod sa iyang pamunoan.