SWERTENG walay namatay atol sa nahitabong pinusilay sa duha ka sakop sa kapulisan niadtong May 30, 2019 mga alas 6:40 sa gabii diha sa Barangay Puerto ning siyudad sa Cagayan de Oro.
Samdan sila si PSSg Arman Tagolimot, nadestino sa Misamis Oriental Police Provincial Office ug si PSMS Jose Ryan M. Sevilleno nga nadestino sa Police Station No. 6, Brgy. Puerto.
Samtang ang upat ka mga sibilyan naila nga sila si Jaymar Canencia, 29, taga Zone-6 Brgy. Bugo; Mary Ann Ordaña, 27, taga Purok-4 Brgy. Tablon; Darlene Vim Eduave, 12, taga Villanueva, Misamis Oriental ug Enelita Salinay, 45, taga Purok 5, Barangay Sugbongcogon, Tagoloan, Misamis Oriental.
Sa pakighinabi kang PLCol Mardy Hortillosa, tigpamaba sa Cagayan de Oro Police Office (Cocpo) gibutyag nga dunay gigukod si Tagolimot nga wanted person sa kasong murder apan pag-abot sa dapit giingong unang nisulay pagpabuto ang suspetsado nga pabiling gipangita apan nag-jam ang armas niini hinungdan nga nibalos si Tagolimot.
Apan giingong nakalihay kini ug nakaigo sa giingong nagtambay sa maong dapit atol sa insidente apan sutaon pa kung kinsa ang nakaigo sa laing mga sibilyan.
Giingong dali nga niresponde si Sevilleno apan nagkapinusilay ang duha human nga giingong wala magkailhanay ilabi na nga pulos wala usab nakauniporme ang duha ka mga pulis ilabi na nga anaa kini sa intelligence unit nadestino.
“Base sa report confirmed nga naa siya’y gisundan nga wanted person, ming drew siyag firearm gitutok sa pulis gipusil niya diretso, ningbunot man atong pulis sa Tagoloan ningpusil siya naay naigo, nakadungog dayon atong pulis sa Puerto miresponde siya, sila na dayon nag engkwentro,” matud ni Hortillosa.
Dili pa masuta kung ang suspek nagpabuto usab sa iyang armas ayha nisibat dayon sa maong dapit.
Nakuha sa Scene of the Crime Operatives (SOCO) team sa pagpangulo ni PLt Fuljean Ragmac gikan sa crime scene ang unom ka fired cartridge ug tulo ka bala sa gitoohang .45 kalibre nga pistola ug lima ka fired cartridge cases sa 9mm nga pistola.
Samtang padayong giimbestigahan ang maong panghitabo tali sa duha ka mga pulis ug padayon usab nga gipangita ang giingong wanted person kinsa nakasibat sa maong insidente.
Dunay tulobagon
Dunay tulobagon ang duha ka mga pulis tungod sa pagkapagan sa mga sibilyan tungod kay duna silay sayop sa maong hitabo.
“Kung imong tan-awon gyud sa police operational procedure naa gyud silay lapses pero ma justify ba nila ang ilang action ug kini ilang action mabutang ba sa exemption?,” matud ni Hortillosa.
Giingong gipailalom sa imbestiagsiyon ang duha ka mga pulis ug posibleng mag-atubang sa kasong administratibo ug kiriminal ilabi na kung mapamatud-an nga duna kini sayop.
“Ani nga sitwasiyon dakog posibilidad nga e restrict sila kay ngano naay sibilyan nga nadamay, nag engkwentro pa gyud silang duha, kung mapamatud-an sila nga naa silay sayop pwedi sila ma filelan og administrative case including na criminal case,” dugang niini.
Gidugang pa niini nga gipalamnan pa ang imbestigasiyon ilabi na nga dunay nanggawas nga taho nga kontra ng daan ang duruha apan gibutyag ni Hortillosa nga walay niabot kaniya nga susamang taho.
Samtang ang kapulisan ang mag-abaga una sa pagpatambal sa nahisgutang mga sibilyan apan depende pa usab sa mogula nga resulta sa Scene of the Crime Operatives (SOCO).