GATOSAN ka mga kapulisan ang ipakatag sa kapulisan sa Cagayan de Oro Police Office (Cocpo) karong adlawa pagbukas sa klase, Hunyo 3, 2019 sa mga tunghaan sa siyudad sa Cagayan de Oro.
Anaa sa kapin 400 ka mga kapulisan inabagan usab sa mga barangay tanod.
Gibutyag ni Police Lieutenant Colonel Mardy Hortillosa, tigpamaba sa Cocpo, nga kini aron daling makaresponde kung ugaling dunay mga panghitabo atol sa unang adlaw sa klase.
“400 kapin nga kapulisan atong ipakatag sa kutob sa makaya sa ato nga mga pulis ug Barangay Tanod,” matud ni Hortillosa.
Magbutang usab ang kapulisan og mga assistance desk aron nga maduolan sa katawhan kung ugaling dunay mga reklamo.
Naghangyo usab ang kapulisan nga lakip ang mga ginikanan ang magbantay sa ilang mga anak ug lakip nga naghangyo nga kung mahimo tudloan ang kabataan nga malikay nga mabiktima sa mga dautang elemento sama na lamang sa dili pakig-istorya ni bisan kinsa ilabi na sa dili kaila tungod na usab kay dili man mabantayan sa kapulisan ang tanang bata.