MOKABAT tunga sa milyon nga kantidad sa ilegal nga druga ang nakuha gikan sa posisyon sa usa ka gituohang drug dealer niadtong Mayo 30, 2019, mga alas 5:00 sa hapon, sa Barangay Kauswagan ning siyudad sa Cagayan de Oro.
Ang maong dinakpan naila nga si Mohammad Salic alyas Abdul, 36, taga Marawi City ug gikonsiderang High Valued Target (HVT).
Gipahigayon sa kapulisan sa Police Station 9 (PS9) sa Macasandig ang buy-bust operation sa nahisgutang dapit ug napalitan si Salic gamit og ilegal nga druga gamit ang P5,000 nga buy-bust money.
Sa pakighinabi kang PCpt Teodoro De Oro, hepe sa PS9 giingong gikonsidera kining drug dealer tungod na usab kay dagko kaayo ang mga dala niini nga gituohang shabu.
“Yes HVT siya, ma consider nato siya na drug dealer na gyud kay dagko man iyang item na dala,” matud ni De Oro.
Nakuha gikan sa posisyon niini ang anaa sa 100 gramo diin gibanabanang anaa sa P500,000.00 ug buy-bust money nga P5 mil lakip na usab ang usa ka pakete sa gitoohang shabu nga dunay 2.5 gramo o buy-bust item.
Ang nahisgutang suspetsado ang detinado sa mini-cell sa PS9 aron sa pagpaabot sa tukmang kaso nga ipasaka batok kaniya.