HUMAN molampos sa iyang unang tahas didto sa Estados Unidos, posibling makaaway na usab og balik si Interim World Boxing Boxing Association (WBA) world featherweight champion Jhack “El Capitan” Tepora sa undercard sa Manny Pacquiao-Keith Thurman world title fight nga gikatakda sa Hulyo 20 sa Nevada, Las Vegas.
Kini maoy gitug-an ni Tepora sa dihang gikahinabi sa Superbalita Cebu pinaagi sa Video Online interview human sa iyang unanimous decision nga kadaugan batok sa Mexicanong si Jose Luis Gallegos kagahapon didto sa Soboba Casino sa San Jacinto, California.
Matod ni Tepora nga modiskanso o mopahuway lang siya og usa ka semana sa pamasin nga mahinayon ang maong hugonhugon ug malikayan ang susama sa nahitabo nga nakanselar ang away tungod sa iyang pagka overweight sa sayong bahin ning tuiga.
Kagahapon, yanong gidominar ni Tepora ang giilang knockout artist sa Mexico nga si Gallegos.
Hinuon giangkon ni Tepora nga grabi gyud kalig-on si Gallegos nga wa gyud kini matumba bisan og permi kining maigo sa iyang mga solidong kumo.
“Lig-on gyud kaayo akong kontra sir, bisan giunsa nako dili gyud madala busa namuntos nalang ko para makatigom ko’g maayo kon mahuman ang 10 rounds fight namo,” padayag ni Tepora.
Gibutyag ni Tepora nga kusog sab ang iyang kontra gani adunay higayon nga gisakitan siya human naigo sa Mexican boxer.
“Nakakat-on ko ani awaya nga dili magdali kay usahay bisan unsaon dili gyud ma knockout ang kontra. Pasalamat gyud ko ni coach Rodel (Mayol) kay iya ko gidisiplina,” dugang ni ni Tepora kinsa pabiling limpyo ang baraha nga 23-0, 17KOs.
Si Gallegos nahagba sa 16-7, 14Kos nga record.
Ang laing Pinoy boxer ni Mayol nga si kanhi WBO Bantamweight champion Marlon “Nightmare” Tapales mipaundang ni Roberto Castaneda sa Mexico pinaagi sa knockout sa 3rd round.
Sunodsunod nga kombinasyon ang gibuhian ni Tapales ang mitumba ni Castaneda sa unang round.
Nakabangon man tuod kini ug nakaaway pa hangtod sa second round apan sa ikatulong hugna gipaundang kini ni referee Ray Corona sa nahabiling 1:37 sa dihang gipauwanan kini sa mga kinumo ni Tapales.
Ang ikaduhang kadaugan ni Tapales sa US naghatod kaniya sa (33-2, 16KO) samtang nalusno ang baraha ni Castañeda sa (23-12-2, 16KO).
Si Tapales nga ubos gihapon sa Rex “Wakee” Salud stable-Cebu unang miaway og midaug batok ni Fernando Vargas Parra niadtong Pebrero 16 sa Microsoft Theatre sa Los Angeles California. (Daniel Quindao Guden, US Correspondent)